ANG kagikan sa usa ka tawo mao bay maayong sukdanan kon unsa siya karon ug sa umaabot? Di ba diay siya mamahimong momugna og iyang kaugalingong dalan nga iyang pagasubayon ug baktason alang sa maayong ugma?

Maayo bang hukman si presidential aspirant Ferdinand “Bongbong” Marcos Jr. base sa mga “sala” sa iyang amahan dihang mao pa kini ang namunoan sa nasod sulod sa 20 ka tuig? O mahimo ba niyang matul-id ang “mga kasaypanan” nga nahimo sa iyang amahan kon siya na usab ang mamunoan? O sublion ba niya ang kagahapon?

Baga ang nangahadlok sa posibleng pagkapili ni Bongbong sa Mayo 2022 elections tungod sa kaagi sa pamunoan sa iyang amahan, labina niadtong pagpatuman sa Martial Law, dihang liboan ang nangawagtang, nangabilanggo ug gi-torture sa military ug sa gibungkag nga Philippine Constabulary (PC).

Di mabasol ang mga sector nga nangahadlok sa Marcos presidency tungod sa di maayong mga kasinatian niadtong panahon sa diktaduriya. Lisod usab ipanghimakak nga way pagpangawkaw nga nahitabo kay dul-an na gani sa P200 bilyunes ang nabawi nga ill-gotten wealth gikan sa mga Marcos.

Kon wa pay pagpangawkaw, nganong duna may nabawi?

Usa ka buhat ang makahupay sa kahadlok sa mga pamilya nga nabiktima niadtong panahuna. Kanang pagpangayo og pasaylo. Lisod kaayo ning buhaton, labina sa usa ka pamilya nga gitahod sa katawhan nga nagpuyo sa ilang tugkaran.

Apan di ba dunay mga supporter si Bongbong nga nagpasigarbo nga siya “healing president?” Kon siya healing president, nagkinahanglan siyang mangayog pasaylo sa mga kasaypanan nga nahimo sa iyang amahan. Diha magsukad kaniya ang “pagpaalim” sa mga samad nga namugna kagahapon. Mga samad nga nagbilin og uwat ug kahadlok nga basin masubli pa.

Ang iyang pagpangayog pasaylo sa mga nasad-an maoy unang lakang padulong sa pagpaalim sa nasod.