PAIMBESTIGAHAN sa Cebu Police Provincial Office ang giingong wala pag-atiman sa usa ka reklamante nga midangop sa Argao Police Station nga matud pa gisumbag siya sa usa ka colonel ug mga kuyog niini atol sa traffic accident usa ka lugar sa lungsod sa Argao, habagatang Sugbo niadtong Enero 20, 2022.

Ang aksidente naglambigit sa usa ka pribadong sedan nga gisakyan sa usa ka “colonel” ug prime mover nga gisakyan sa driver ug iyang pamilya nga gilangkuban sa asawa ug duha ka mga anak.

Matod ni Police Lieutenant Colonel Mark Gifter Sucalit, deputy provincial director sa (CCPO) nga nahinabi sa mga sakop sa media nga ang niabot nga report sa Argao Police Station may labot na sa usa ka traffic accident.

Walay naka blotter nga gisumbag o diba kaha gikulata ang driver sa prime mover.

“Sa akong nabasahan, Sir, ang kadto rang sa post. But with regards to the complaint sa alleged colonel sa Argao Police nga giingong nanumbag, walay reported niini,”. matod ni Sucalit.

Sa iyang Facebook post niadtong Enero 23, Dominggo, si Suzette Camanse niangkon nga nadumbolan ang sakyanan sa “colonel” dihang gilikayan sa iyang bana nga si Edito nga direkta kining mabanggaan dihang nanghunong ang nag-unang mga sakyanan.

“Nihunong ang Ceres bus. Nihunong ang nagsunod nga service car ug nihunong ang sakyanan nga nasundan sa akong bana. Ug kay tan-aw sa akong bana nga maigo jud ang sakyanan, iyang gi-waive ang mover ug naigo ang luyong bahin sa sakyanan sa Colonel, nabuak ang bildo ug nalumping kay naigo sa trailer sa akong bana” matod ni Suzette sa iyang post.

Siya nipasangil nga gibira ang iyang bana sa colonel ug nanghulga nga “papatayon ko ang pamilya mo, anak mo at apo mo.”

Dayon giingong gisukmag ang iyang bana hinungdan sa pagkasamad sa nawong.

Gikustodiya ang iyang bana sa kapulisan human sa hitabo.

Nipasangil si Suzette nga giduol sa iyang bana ang imbestigador kay magpa blotter siya sa pagpanukmag.

“Paghuman sa ilang atubang giduol sa akong bana ang police investigator on duty ug giingnan sa akong bana nga magpa-blotter mi sa pagdapat ug pagpanghulga sa Colonel namo ug sa dihang wala okay hi nila ug ambot og ngano?,” matod ni Suzette sa iyang post.

Gipanghimakak sa Argao Police ang pasangil. Matod nila nga si Edito giatiman ug giasikaso sa imbestigador ug gihimoan og incident report ug gipapirmahan sa iyaha lakip na ang pag himo sa Argao Police og request letter alang sa medical examination, apan nidumili si Camanse.

Giingong nilakaw kini, gibiyaan ang papel kay nagdali siya tungod kay duna pay kuhaon ug ihabwa nga mga construction materials nga paingon ideliber sa dakbayan sa Carcar.

“This station vehemently denied this unfounded and baseless accusations. As a matter of fact, Mr. Edito Camance was provided by Argao PNP duty investigator with incident report form to sign for and even prepared a letter request for the medical examination, but the latter left in a hurry to pick up and load construction materials for delivery at AC Steel Corp.,” matod sa opisyal nga pamahayag sa Argao police.

Si Sucalit miingon nga sa ilang pagsusi walay pormal nga reklamo sa Argao Police Station..

“Wala pay formal complain na siya but as to the matter of our SOP, imbestigahan gyud," dugang Sucalit.

Awhag ni Sucalit ngadto sa publiko nga kon ingon ana nga insidente, mas labing maayo ang pagpaabot gyud sa kapulisan aron pormal nga reklamo ug maaksiyonan nila.