ANG Cebu City Government ug Expedition Construction Corporation (ECC) nipirma og joint venture agreement (JVA) sa Huwebes, Enero 27, 2022 human sa pito ka tuig para pagtabon, pag-develop sa 60 ektaryas nga Pond A sa South Road Properties (SRP) ug paglimpyo ug pag-develop sa 15 ektaryas nga kanhi Inayawan landfill.
Si Mayor Michael Rama maoy ni-representar sa Cebu City Government samtang si Mr. Simon Paz, chairman ug chief executive officer sa MCC isip private proponent maoy nirepresentar sa kompaniya.
Ang kompaniya maoy motambak og yuta sa 60 ektaryas nga Pond A ug mohakot sa kapin o kulang 4 milyones metric tons nga basura sa Inayawan.
Ang project manager sa ECC nga si Brian Paz, nagkanayon nga P20 bilyones ang ilang gitaganang puhonan para sa pag-develop sa Pond A ug Inayawan landfill kansang pagtrabaho molanat hangtod sa lima ka tuig.
“We are excited to deliver to the people of Cebu a world-class development business center, recreational amenities and a medical facility in this once unproductive area,” matod ni Paz.
Ang anak sa chairman ug chief executive officer sa ECC nga si Bryan nagkanayon nga posibleng magsugod na sila pagtrabaho sa Pond A ug sa kanhi landfill sa Pebrero sanglit aduna lang silay giusab sa ilang detailed engineering design.
“We are applying in this Inayawan landfill the latest in technology which will be the first in the Philippines. Rest assured that we, the private proponent of this project, have nothing in mind but to be able to contribute to the city’s objective to be more progressive and raise the city to it’s greatest heights,” dugang sa project manager.
Si Atty. Collin Rossell, gitudlo ni Rama nga spokesperson sa JVA, nagkanayon nga 50-50 ang bahinay sa income sa mixed-use development sa Pond A samtang lahi pa ang bayranang buhis nga maoy mahimong income sa City Hall ug labaw sa tanan ang libuan ka trabaho nga mamugna gumikan sa proyekto.
Ang majority floor leader sa city Council nga si Konsehal Raymond Garcia maoy nipasar og resolution sa Konseho human sa gipahigayon nga mga discussion labot sa JVA aron tugotan si Rama para makapirma uban sa ECC ug masugdan na ang pagpalambo sa maong mga lugar.
Gipadayag usab ni Garcia nga aduna say tulay nga tukoron aron maoy magkonektar sa landfill ug Pond A, hospital ug open recreation facility nga tukoron sa ECC nga walay gasto ang Cebu City subay sa hangyo ni Rama.
Niadtong 2014, dihang si Rama ang mayor, ang ECC niduso og unsolicited proposal ug nahatagan og original proponent status pagka-Nobyembre sa samang tuig.
Nagpadayon ang negusasyon uban sa joint venture selection committee hangtod sa Abril 2016.
Isunod na unta ang Swiss challenge apan napilde si Rama sa election sa Mayo 2016 ug wala na mapadayon human nihulip si kanhi mayor TomaS Osmeña.
Ang ECC nisang-at og kasong specific performance batok sa Cebu City Government niadtong Disyembre 2018 sa Quezon City.