ANG nagpadayon nga drainage project sa Dakbayan sa Lapu-Lapu nakamugna og laing aksidente sa sakyanan niadtong Enero 23, 2022.

Usa ka drayber sa motorsiklo gikatahong naangol human mahulog sa gikawot nga dapit sa Barangay Maribago.

Si Julito Conde, kanhi radio reporter, ni-post sa iyang Facebook account sa aktuwal nga video nga nagpakita sa drayber ug sa iyang motorsiklo nga anaa na sa ilawom sa lungag.

Giawhag ni Conde ang Department of Public Works and Highways (DPWH) nga paspasan ang proyekto nga daling madisgrasyahan sanglit wala kini tabon.

Si Maribago Barangay Captain Rusell Abing niingon nga ang drayber naglikay nga mabangga sa laing sakyanan hinungdan nga nawad-an siya og kontrol sa motorsiklo.

Gipadala ang Emergency Rescue Team sa barangay aron paghatag og first aid ug paghatod sa biktima sa labing duol nga tambalanan, matod ni Abing.

Dugang pa ni Abing nga ang construction site gipalibotan og yellow nga caution tape aron pagpahimangno sa mga motorista nga adunay pagpangubkob nga nahitabo.

Matod sa kapitan sa barangay, kini na ang ikatulong vehicular accident sa barangay sukad sa pagsugod sa proyekto unom na ka buwan ang nakalabay.

Kasagaran sa mga disgrasya nga nahitabo sa maong lugar tungod sa overspeeding ug reckless driving, matod ni Abing.