MOABOT sa 11 ka mga sugarol ang nadakpan dihang gironda sa kapulisan ang tigbakay sa Sitio Colina, Barangay Tamiao sa lungsod sa Bantayan sa Miyerkules sa hapon, Enero 26, 2022.
Nikabat sa 16 ka mga buhing manok nga igtatari samtang laing duha ang manok nga patay na ug kuwarta nga balor P1,500 ang nasakmit sa mga awtoridad.
Si Police Major Windell Abellana, hepe sa kapulisan sa Bantayan, maoy nangulo sa operasyon, diin gibana-bana nga 16 ka mga sugarol ang nakaipsot dihang nakabantay sa pag-abot sa mga pulis.
Ang mga dinakpan pulos taga Bantayan.
Matod ni Abellana nakadawat sila og taho nga dunay ilegal nga sugal sa dapit hinungdan nga gihimo nila ang operasyon human nakompirmar sa ilang mga tigpaniid nga gipahigayon ang tigbakay bisan kon kini ilegal, labina ning pandemic.