MGA barangay kapitan sa dakbayan sa Lapu-Lapu nitiyabaw sa mga pasangil ni Mayor Junard “Ahong” Chan nga wa sila makig-alayon sa paghatag sa P5,000 nga hinabang pinansyal sa mga biktima sa bagyong Odette.

Ang Liga ng mga Barangay President ug Bankal Barangay Captain Eduardo Cuizon giubanan sa laing 13 ka mga barangay kapitan sa usa ka press conference Huwebes, Enero 27, 2021.

Ang mga barangay kapitan nga ningtambong mao sila si Evaristo Dihayco (Mactan), Arsenio Berdin (Babag), Rusell Abing (Maribago), Ranilo Abatan (Caohagan), Arselito Pejo (Calawisan), Reynaldo Tampus (Canjulao), Joselito Tibon (Subabasbas), Johanna Capangpangan ( Pajac), Mary Jane Cahilog (Ibo), Gina Soroño (Buaya), Eleonor Fontanoza (Gun-ob), Regina Ybañez (Looc), ug Triponia Abayan (Tungasan).

Nagkahiusa sila sa pagpanghimakak sa nangaging mga pamahayag ni Chan nga ang pagkalangay sa pag-apod-apod sa hinabang pinansyal tungod sa kakuwang sa kooperasyon sa mga opisyal sa barangay.

Matod ni Cuizon nga human sa pagkuso-kuso sa bagyo, ila nang gipasiugdahan ang paghimo og listahan sa mga apektadong konstituwente ug ang listahan gipaabot ngadto sa City Social Welfare and Development Office (CSWDO) bisan sa wala pa ang mando ni Chan.

Si Ybañez sa Barangay Looc nisaway usab sa mayor nga wala mobisita sa ilang barangay human sa pagkuso-kuso sa bagyo.

“Tingali maong naka ingon siya ana nga walay gihimo, kay walay mayor nga niduaw sa Barangay Looc. Walay mayor nga nangamusta,” matod ni Ybañez.

Dugang pa ni Ybañez nga niabot lang ang food packs gikan sa Dakbayan tulo ka adlaw human ang bagyo mikusokuso sa siyudad ug 100 lang ka putos ang nahatag.

Si Fontanoza sa Barangay Gun-ob niingon usab nga tungod sa mga pamahayag sa mayor, gibasol usab sila sa mga tawo nga wala masayod nga nagkugi sila sa ilang kapasidad isip barangay kapitan.

“Lisod kaayo sa among part karon. Kami nag lihok, kami pa ang gi blame sa katawhan,” matod ni Fontanoza.

Matod usab sa mga barangay captain nga wala na masunod ang listahan sa mga benefeciaries sa cash aid nga ilang gisumite sa CSWDO hinungdan nga wala na maapil ang pipila sa ilang mga konstituwente atol sa distribution.