TULO ka gikatahapang drug pushers nasikop sa mga buy-bust sa managlahing mga dapit sa lalawigan sa Sugbo.

Unang nasikop sa buy-bust sa Barangay Poblacion, lungsod sa Dalaguete sa Miyerkules, Enero 26, alas 12:35 sa udto mao si Gregorio Lenares, 52, nagpuyo sa nahisgutang lugar.

Si Major Gilfred Baroman, hepe sa Dalaguete Police Station nga nahinabi sa Superbalita Cebu, nagkanayon nga nakuhaan og paltik nga armas si Lenares, kinsa gikahadlokan sa dapit.

Nakuhaan si Lenares og walo ka putos sa drugas, P500 buy-bust money, ug usa ka caliber .22 Magnum revolver nga dunay tulo ka mga bala.

Samtang, ang managsilingang pushers nasikop sa buy-bust sa ala 1:05 sa hapon sa Huwebes, Enero 27, sa Lower Campo, Brgy. Poblacion, lungsod sa Pinamungahan.

Si Major Vincent Zozobrado, hepe sa Pinamungahan Police Station, nibutyag sa Superbalita Cebu, nga ang mga dinakpan mao sila si Javit Paglinawan Nerosa, 43, ug Andy Aldiano Delapa, 33.