LUYO sa pagmahal sa "galunggong" gumikan sa kanihit niini, plano karon sa Department of Agriculture (DA) nga moangkat niini gikan sa laing nasud sama sa China ug Vietnam aron dili makulang ang supply sa merkado.
Mga fish vendors sa Bankerohan Public Market sa Davao City miangal na sab sila gumikan sa kanihit sa supply sa galunggong, apan suma nila, naa pa gihapon mapalit ang katawhan.
"Hinuon, dili man ka parehas sa Manila nga nagnihit gyud, naa may pagnihit sa Davao, pero naa man gihapon mapalit ang mga tawo," ingon ni Gerlie Giger, usa sa mga fish vendor nga nahinabi sa Superbalita Davao.
Sumala ni kanhi DA secretary Emmanuel "Manny" Piñol nga puwede nga moangkat og isda sa laing nasud apan ibalanse kini ug di saligan ang pag-angkat, diin kinahanglan suma pa nga i-institutionalize kini sa gobyerno.
Mas maayo suma pa nga mas palapdan pa sa gobyerno ang plano alang sa dagko nga mga hatcheries aron sa ingon panahon sa spawning season di maglisod sa supply sa mga isda nga sagad maoy ginapalit sa mga pobre.
"During my time as DA secretary, gipa-rehab nako ang tanang hatcheries... all over the Philippines, Bohol has one, Davao has one, Mindanao naa pero gagmay-gagmay," ingon ni Piñol sa pakighinabi sa mga tigbalita sa Davao sa miaging adlaw.
Sa kasamtangan, bastante gihapon ang galonggong sa merkado sa Davao City diin ang presyo niini nagdula sa P180-P240 ang matag kilo depende sa gidak-on sa mga nag-unang palengke sa Davao City.