PANABO CITY, Davao del Norte -- Wala misaler ang ka-master ni alyas Master human nga nasikop kini sa mga sakop sa Regional Special Operation Group/Regional Drug Enforcement Unit (RSOG-RDEU)-Davao atol sa buy-bust operation alas 11:25 sa gabii, Enero 26, 2022 didto sa Purok 15, Barangay New Visayas.

Mga shabu ug pusil ang nakuha sa posisyon sa suspek nga si Jonhrey (bansagon gitago), alyas Master, 21-anyos, Meat Vendor ug nagpuyo sa La Filipina, Tagum City.

Sumala sa awtoridad nga usa ka hiniusang operasyon ang ilang gihimo nga gipangunahan sa RSOG-RDEU-Davao sa pagpanguna ni Police Lieutenant Louie Balmori ubos sa superbisyon ni Police Lieutenant Colonel Ronald Lao ug sa Panabo Police Station ubos sa hepe nga si Police Lieutenant Colonel Verna Cabuhat.

Idlas suma pa ang suspek, apan wa na kini ka-eskapo dihang nakorner na siya sa pakigtransaksiyon sa nagtakuban nga kapulisan.

Duha ka mga pakite sa gituohang shabu ug usa ka homemade caliber .38 revolver ang narekober sa posisyon sa dinakpan.

Tulo ka mga kaso ang atubangon sa suspek ang Republic Act (RA) 9165, kun Comprehensive Dangerous Drugs Act of 2002, RA 10591 kun Illegal Possession of Firearms ug ang kalapasan sa Comelec gun ban. (Jeepy P. Compio)