TULO mga lalake, usa nangangkong kawani sa Visayan Electric Company (Veco), ang nasikop sa National Bureau of Investigation (NBI) 7 human nasakpan sa akto nga nangayo og kuwarta bugti sa pagpahibalik sa kuryente sa pipila ka mga balay sa dakbayan sa Talisay.
Ang mga ehente sa NBI 7 ubos sa pangulo ni investigation officer Wenceslao Galendez nakasikop nila ni Maximo Mariot Jr., kinsa niingon nga kawani sa Veco; linemen Bryan Sacman ug Doroteo Auxterio Jr.
Ang tulo nasikop atol sa entrapment operation sa NBI 7 sa Sitio Nangka, Barangay Mohon, Talisay niadtong Martes, Enero 25.
Nasikop ang tulop human sa reklamo nga nadawat sa Veco gikan sa ilang mga kustomer nga dunay pipila ka linemen ang gikatahong nangayo og kuwarta bugti sa pagpabalik sa kuryente.
Sa affidavit ni Galendez nagkanayon nga siya ug ang iyang mga kaubang ahente sa NBI naniid sa kalihokan ni Mariot human nadawat og taho gikan sa Veco bahin sa iyang modus operandi.
Nasuta sa NBI gikan sa Veco nga kanhi konektado isip accredited electrician alang sa power distributor apan ang iyang accreditation mi-expire na.
Sa ilang duha ka managlahing dapit sa pagpaniid, si Galendez uban sa iyang team nakakompirmar nga si Mariot ilagal nga nangayo og bayad bugti sa pagprayoridad sa pahibalik sa power.
Gawas sa Talisay City, si Mariot gikataho nga nakahimo usab sa iyang illegal operations bisan ngadto sa lungsod sa Consolacion sa amihanan sa Metro Cebu.
Si Galendez nagkanayon nga ang mando sa pag-entrap ni Mariot, siya ug iyang kaubang ahente nakigkita sa suspek sa usa ka mall sa Cebu City aron pagpakisabot sa pagbalik sa power ilang balay sa Talisay City.
Sila si Galendez nagpakaaron-ingnon nga tag-iya sa balay.
Atol sa ilang sabotsabot ni Mariot, ang suspek nidemanda kang Galendez ug laing usa ka kauban sa pagbayad og P10,000 bugti sa pagpabalik sa kuyente sa ilang balay ug kasilinganan.
Lunes, Enero 24, si Galendez ug ang iyang team nipadayon sa operasyon sa pagtunol sa salapi human nakakuha og go signal gikan ni NBI 7 director Rennan Oliva.
Sa samang adlaw, si Galendez nakigkita kang Mariot sa Banawa, Guadalupe sa pagbayad og P10,000 nga marked money ngadto sa suspek.
Gawas sa pagdawat og P10,000, si Mariot nidemanda og P1,400 gikan ni Galendez diin ang suspek niingon nga gamiton sa pagbayad sa dispatcher nga trabahante sa Veco nga gikatahong mag-andam sa job order request mga gikinahanglan sa power supply sa reconnection sa mga balay.
Apan wala dayon motrabaho si Mariot ug iyang sa maong adlaw nga gikasabotan.
Martes, Enero 25, usa sa mga kauban ni Galendez nakigkita kang Mariot sa South Bus Terminal tungod sa kakusog sa uwan niadtong tungora.
Ang kauban ni Galendez gidala dayon ni Mariot sa Talisay City aron paghimo sa reconnection.
Samtang nagsusi sa wirings sa dapit, si Mariot nisulti sa kauban ni Galendez nga naghinahanglan sila og dugang P5,000 tungod sa giingong 'grabeng kadaut.'
Usa sa mga ahente nga nagpakaaron-ingnon nga molupyo sa dapit ang nihatag dayon sa P5,000 ngadto kang Mariot aron matrabaho apan si Mariot kalit lang nikuha sa iyang phone ug dunay gitawag.
Samtang diha sa dapit, sila si Sacman ug Auxterio nangabot sakay sa sakyanan nga dunay marka nga Visayan Electric ug nakigkita kang Mariot sa pagsugod sa pag-ayo.
Apan dunay laing residente ang niduol kang Mariot nga gusto patan-aw ang power supply sa ilang compound sa maong barangay.
Human sa hamubo nga sabotsabot, nadungog sa NBI agent nga si Mariot nangayo og bayad nga P4,500 sa pagpahibalik sa power supply ug gibayran kini sa babaye.
Samtang naobserbar kang Mariot ug duha ka linemen nga nagtrabaho, si Galendez ug ang iyang team nakadawat og mensahe sa Veco nga ang work job order gihatag ngadto nila ni Sacman ug Auxterio sa pagtrabaho sa dapit apan wala moagi o way pagtugot gikan sa Emergency Dispatch Supervisor, busa ilang gikonsiderar nga ilegal.
Human sila si Mariot, Sacman ug Auxterio nakahuman sa trabaho, usa sa mga NBI agent niduol sa tulo ug nihatag sa bayad nga P15,000 nga marked money.
Mao kini ang nagsilbi kang Galendez ug iyang mga ahente sa pagpaliot sa mga suspek ug gidakop.
Kagahapon, Enero 27, ang NBI 7 nidala sa tulo sa Talisay City Prosecutor's Office.
Ang tulo gipasakaan og kasong kalapasan sa Republic Act 7832 or the Anti-Electricity and Electric Transmission Lines/Materials Pilferage Act ug Article 318 of the Revised Penal Code.
Si Talisay City Prosecutor Maria Alice Lim-Ingles, kinsa nagkupot sa inquest proceeding, niasoy sa SunStar Cebu nga ang tullo makamo sa pag-avail sa ilang right to preliminary investigation apan nausab ang ilang hunahuna nga motubag sa mga alegasyon sa korte.
Busa ang rekalmo batok sa tulo ipasaka sa korte alang sa paghusay.
Sa usa ka press conference, si Oliva nagkanayon nga nagpadayon pa ang imbestigasyon aron ma-flash out ang ubang mga tawo nga nalambigit ug kadtong nagpabiling gawasnon.
“Mahibong ka nganong kanhi accredited electrician sa Veco, kuyog sa duha ka contractors sa Veco nga current contractors? Nganong nag kuyog silang tulo?,” matud pa niya.
Dugang pa ni Oliva nga posibleng pasakaan usab og kaso ang ubang mga tawo nga nalambigit.
Si Oliva niingon nga ilang nasakmit ang labing menos tulo ka identification cards nga gihuptan ni Mariot, nga iyang gigamit sa pagpakigsabot sa mga konsumidor alang sa dinalian nga pag-uli sa suplay sa kuryente.
Gawas niini, nakuhaan usab nila og daghang billing statement ang mga konsumidor gikan sa iyang possession atol sa pagkasikop diin dili siya ang in-charge niini dihang nagtrabaho siya isip accredited electrician niadto.
Ang presidente ug chief operating officer sa Visayan Electric nga si Raul Lucero, sa iyang bahin, niingon nga nakadawat sila og mga taho sa giingong pagpangilkil sa kuwarta pipila ka adlaw human sila nagsugod sa ilang mga paningkamot sa pagpabalik sa kuryente.
Matod ni Lucero nga nihimo dayon sila og kaugalingong imbestigasyon kon asa posibling nahitabo ang insidente.
Nagsugod sila sa pagtigom sa tanan nilang mga contractor ug pagtuki sa tanan, apan si Lucero niingon nga nangayo sila og tabang sa bureau niadtong Enero 11 sanglit daghan ra kini.
“Kaning atong nakita karon, usa lang ni sa mga modus ang nahibaw an. Naa pa gyuy ubang mga ginabuhat sa ubang lugar. Posible nga dili lang ni usa ka tawo ang nagahimo ani ug daghan pa,” matod niya nga nanghinaot nga madakpan sila.
Ang presidente nmiingon nga ang kompanya dili motugot sa ingon nga matang sa mga kalihokan, kay ang ilang mga serbisyo libre ug ang mga konsumidor dili kinahanglan nga mobayad bisan unsa aron ma-energize.
“But siguro ang uban desperado na pod kaayo nga willing na pod mobayad at any cost basta makakuha og kuryente. We understand nga medyo dugay dugay na gyud, but then again tungod sa kadako sa problema, di sad gyud namo ma solve one time,” dugang niya.
Matod pa ni Lucero nga aduna usay mga taho nga nabiktima ang ubang mga konsumidor pinaagi sa pagbayad daan apan wala pa mauli ang ilang kuryente.
Subay niini, giawhag usab ni Lucero ang mga konsumidor nga dili dasigon ang maong mga ilegal nga kalihokan.
Matod ni Oliva nga ang ilang imbestigasyon naglakip usab niadtong nagpakaylap og fake news nga gipasagdan sa Visayan Electric ang mga insidente sa pagpangilkil, ug midugang nga kini maoy hinungdan sa kagubot.
Matod ni Lucero nga ang management ug ilang mga personnel, ilabina kadtong nagtrabaho sa tinuod, hilom nga naapektuhan sa mga taho nga ang ilang organic personnel nangilkil sa ilang kaugalingong mga konsumidor.
“Mao nang amo ning gi-take seriously kay maka-damage man gud sa morale sa atong mga tawo nga naghago karon nga almost 12 to 16 hours nagtrabaho kada adlaw para lang ma-reenergized and then makadawat ta ani nga komentaryo,” matod niya.
Giklaro usab ni Lucero nga si Mariot dili ilang empleyado kondili usa lamang ka kanhi accredited electrician sanglit na-terminate kini sukad niadtong 2015.
Sa kaso sa duha ka lineman, si Lucero niingon nga ila pang tukion kon duna bay kalambigitan ang kontraktor sa ilegal nga kalihokan una pa sila makahukom kon i-terminate ba nila ang ilang kontak o dili.
“Ato sang tan-awon kon unsa ang ilang connection kay lisod pod kaayo at this point in time, gipugos tag decision nga ingon ana nga we have not yet conducted the full investigation,” dugang pa niya Ang tulo ka mga akusado, kinsa temporaryong gitanggong sa NBI 7 detention facility, nagdumili hinuon sa pagkomento bahin niini.