ANG police colonel nga giigong nikulata ug nihulga nga patyon ang drayber sa prime mover truck nga nibangga sa sakyanan niini hugot nga mihimakak sa pasangil, apan iyang giangkon nga iyang nakasab-an ang drayber.
Nakuha sa dash camera sa sakyanan ni Police Colonel Robert Lingbawan, hepe sa Siquijor Police Provincial Office (SPPO) nga niadtong Enero 20, Huwebes, sa alas 8:30 sa gabii nga samtang nagsubay sila sa national highway sa lungsod sa Argao, makita ang dakong truck nga nagsunod kanila.
Sakay sa van ni Lingbawan ang iyang pamilya apan pipila ka minutos, ni-overtake ang prime mover apan nasangit kini sa luyo nga bahin sa van.
Tungod sa kakusog sa impact, nabuak ang bildo sa van samtang ang mga sakay niini nisinggit sa kahadlok ilabi na ang duha ka mga anak sa police official nga naa sa luyo naglingkod.
Gibutyag ni Lingbawan nga nakita pa niya nga nangaligid ang duha niya ka mga anak tungod sa kakusog sa pagkabangga ug maayo nalang kay wala ra makaangkon og kadaot sa ilang lawas.
Giangkon niya nga nasuko siya niadtong tungora nga maoy hinungdan nga mikanaog siya sa sakyanan ug gikasab-an ang drayber nga si Edito Camance.
Nagpaila siya nga pulis ug mimando nga panaugon apan nagdumili kini kay tawgon pa una niya ang iyang amo nga usa usab ka pulis.
Apan sa dihang nakanaug na, gipangutana kini kon nganong kusog ang iyang dagan apan giingong wala kini motubag hinungdan nga nanawag na si Lingbawan sa mga pulis sa Argao aron mohimo og imbestigasyon.
MGA TAWO MIDUMOG
Pipila ka segundo, ang mga residente sa dapit ang kalit lang nga nidumog tungod sa kasuko ug ilang gipangdapatan si Edito nga nakaingon sa bun-og sa nawong niini, sukwahi sa pasangil sa asawa niini nga si Suzette Camance nga nag-post sa komentaryo sa social media.
“Nagalit talaga ako, kasi, ang lakas ng impact sa sasakyan naming, ang mga anak ko pagulong-gulong sa loob ng van at iyak ng iyak dahil sa takot nila sa nangyari, lumabas ako nakatsinelas lang ako, eh. Nagpakillala ako na police at sinabihan ko siya na bumaba kasi nakabangga sya, eh ayaw nyang bumaba dahil tawagan pa daw nya ang amo nya na isang police. Nuon lumabas na siya yung mga bystanders na ang sumapak sa kanya may video ako nakuha dyan,” matod ni Lingbawan.
TAG-IYA SA TRUCK
Matod ni Lingbawan nga human madala ang drayber ug usa ka babaye sa police station sa Argao, mibalik siya pagkaugma sa Biyernes, Enero 21, 2022 aron mosang-at og reklamo.
Apan ang tag-iya sa prime mover nga si Police Master Sergeant Roy Babor nga nadestino sa Negros Oriental Police Provincial Office nangayo og pasaylo kaniya.
Miangkon kini nga sayop sa iyang drayber ang hitabo ug mipasalig nga andam niya nga abagahon ang gasto sa pagpaayo sa damage sa sakyanan basta lang nga dili ma apektohan ang iyang negosyo.
Gumikan sa kaluoy sa drayber nga mawagtangan og lisensya kon iyang ipadayon ang kaso, nisugot si Lingbawan nga makig-areglo ug sa atubangan sa hepe sa Argao Police Station nipirma si Lingbawan sa settlement agreement.
"Naawa din ako ba kung itutuloy ko yung kaso ma impound ‘yung sasakyan ng police at mawawalan ng lisensya yung draayber naman. So, naki pag settle ako,” dugang ni Lingbawan.
Lunes, Enero 24, nabasahan nalang niya sa social media nga nagpost na ang asawa ni Edito nga si Suzette nga nag-aligar sa usa ka police colonel nga nikulata sa iyang bana ug nihulga pa nga patyon ang tibuok niining pamilya.
MISAKAY SA ISYU
Ang tag-iya sa prime mover nitug-an nga ang mga igsuon sa asawa ni Edito nisakay sa isyu ug mao ang nangusog nga moreklamo.
Matod niya nga wala na unta silay problema sanglit dili na mohinayon og pasakag kaso si Lingbawan.
“Dili ko ka koan kon unsay ilang rason. Nagkas-etoryahanay naman unta mi didto nganong ni reklamo pa man ni. Unsa diay ilang gusto nilang mahitabo nga human na man na, amo nanang gi-patch-up ug nangayo nakog pasaylo ni sir Lingbawan. Ana ko ni, Sir, nga maayo nga ato lang ni setolon. Ako lang tubagon ang tanang obligasyon kanang imong sakyanan, Sir, ako lang na koanon, kay sala man gyud sa akong driver kay siya man ang nakabundol,” matod ni Babor, tag-iya sa prime mover.
Nahinabi usab niya si Edito nga naa karon sa Negros kon nganong ni nireklamo pa sila ug miangkon matod pa kini nga dili na siya moreklamo, apan misakay ang iyang kabanay ilabi na ang habig sa iyang asawa.
“Wala naman, gi-patch-up na nako na para wala nay problema, so, nganong paaboton man nato sa punto ingon ana, nganong mangita man gyud tag problema,” dugang ni Babor.
MOKIHA NA
Tungod sa gipasiatab sa asawa ni Edito diha sa social media ug sa radyo, nagplano karon ang kampo ni Lingbawan nga mopasakag kaso sa pasangil sa asawa nga walay kamatuoran.
Naluoy usab siya sa iyang mga anak tungod kay hangtod karon na-trauma pa kini sa hitabo nga bisan makadungog og paka sa pultahan magkurog na kini.