SAMATANG nagdagan na ang mga adlaw sa eleksyon, makapaabot ang mga netizen og mga fake news o mga misleading nga posts sa trolls nga gipakatap usab sa mga supporter sa matag kandidato nga sa way pagduha-duha ug pagsusi, mi-repost usab niini.

Human lang sa presidential interviews, mga kampo nila ni presidential aspirant Bongbong Marcos ug Bise Presidente Leni Robredo nagbaslanay og mga post nga pagdayeg ug pagbugalbugal sa duha. Naka focus ang supporters sa duha ka mga kampo.

Ang tagsa ka kampo nag-iyahay og palutaw kinsay bright ug kinsay bugu sa duha ka mga kandidato. Ipagawas sa matag kampo nga usa kanila nagpataka og yawit. Ang supporters nga grabe ka loyal, mo-repost gilayon sa way pagsusi kon tinuod ba o di.

Sa internet karon, sayon ra kaayo ang pagsusi sa katinuoran pinaagi sa paggamit sa Google ug uban pang search engines.

Kon ikaw intelihente nga botante, bisan kon duna ka nay gilabanan nga kandidato, isip responsable ug edukadong lumolupyo, imong responsibilidad ang pagsusi sa katinuoran. Di kay imo lang lamyon. Usa sa mga timaan sa fake news kay di mo kini makita sa mainstream media, nga maoy tinubdan sa kridible o katuohan nga mga balita.

Ang website nga tinubdan mahimong masusi pinaagi sa pagtan-aw sa iyang mga sulod, kana kon mao ni ang tinubdan sa usa ka balita o artikulo. Kon imong makita nga ang sulod niini pulos lang sa imohang kandidato o sa kaatbang, kini nga website di katuohan ug ang katinuoran sa gi-post kwestyonable.

Mas maayong maedukar kay sa sirhan ang panghuna-huna tungod lang sa imong loyalidad sa usa ka kandidato. Pinaagi man gud sa pagsusi ug pagkuti-kuti, diha mo makita ang kamatuoran ug katinuoran, kon ang imong kandidato di ba bakakon ug limbungan. Sa kampanya pa lang, makita mo na kini.