Nalzaro: Chopsuey politics
KINING pulitika sa Sugbo labi pa ang affiliation sa locals parties ngadto sa nationals parties alang sa umaabot nga national elections karong Mayo, morag chopsuey. Kana bang putaheng Intsek nga daghan kaayog sagol. Ang national parties mangita og local parties aron maoy modala sa ilang mga kandidato. Dili man god madala sa mga national candidates nga kampanyahan ang tibuok nasud. Depende sa sabot sa matag partido o ba kaha sa ilang mga baruganan ug kon magkatakdo ba ang ilang plataporma de gobiyerno.
Una nang mideklarar ang Bando Osmena Pundok Kauswagan (BOPK) pinaagi sa ilang pangulo nga si kanhi Mayor Tomas Osmeña nga sila ni Vice Pres. Leni Robredo ug Senador Kiko Pangilinan ang ilang suportahan pagka-presidente og pagka-bise presidente. Pero aduna koy nakoykuyan nga ang ubang taga BOPK adto mosuporta ni Senador Manny Pacquiao. Dili lang sila gustong magpubliko. Ayo nga duklon ni Tomas.
Samtang ang Barug Party ni Mayor Mike Rama mosuporta ni Bongbong Marcos Jr., ug Inday Sara Duterte. Unsa man ni, naa nay ‘go signal’ ni Senador Bong Go ug President Rodrigo Duterte? Di ba sige man og ingon si Mike nga ang ilang suportahan kadtong i-endorso ni Digong? Mi-endorso na diay si Digong ni BBM nga puwerte man niyang daut? Kang Inday Sara, iya god nang anak, iya gyud suporthan.
Sa lalawigan, wala pa modesisyon si Gov. Gwen Garcia. Pero paminaw nako morag Isko Moreno ni ang One Cebu Party. Si third district Cong. Pablo John Garcia ang mo-abi-abi ni Isko matag anhi sa Sugbo. Apan si Liloan Mayor Christina Frasco, tigpamaba ni Inday Sara, dili maapeki niini? Samtang si Ace Durano nga kandidato pagka-gobernador mipadayag sa iyang BBM-Sara support, apan si Bise Gobernador Hilario Davide III, iyang runningmate, kang Leni-Kiko.
Atong gi-respituhan ang ilang individual ug party decisions. Pero ari na sa public endorsement ug rallies kon naa man. Dili kaha maglibug ang mga botante nga moresulta sa pagkabuak-buak? Komportable kaha nga mobarug ang national candidates nga aduna laing gi-endorso ang local party? Maoy giingon nga ‘chopsuey’ politics’, putahe nga daghag sagol. (bobbygnalzaro@gmail.com)