TACURONG CITY -- Gisang-at na ngadto sa korte ang kasong double murder batok sa babayeng suspek sa pagpatay sa mag-inahan human mitahan ngadto sa mga awtoridad alas 2:25 sa hapon, Huwebes, Enero 27.

Giila ang suspek nga si Elvie Frenilla, 39, minyo ug molupyo sa Purok Crossing Laud, Barangay Kalawag 2, Isulan, Sultan Kudarat.

Gibutyag ni Sultan Kudarat Provincial Police Office Director Colonel Tom Tuzon nga giubanan sa iyang mga igsuon ang suspek sa pagsurender ngadto sa Isulan Municipal Police Station.

Dala sa suspek sa iyang pagsurender ang pula nga t-shirt nga dunay mga mantsa sa dugo, itom nga short pants ug mga tsinelas.

Gipailawom na siya sa Deoxyribonucleic Acid o DNA examination.

Giangkon ni Frenilla nga siya ang mipatay sa mga biktima nga sila Noralyn Eribal ug walo ka tuig nga anak niini nga lalaki.

Posibleng pangawat ang hinungdan sa suspek sa pagpatay sa mag-inahan nga iyang gitusak-tusak sa pagdunggab.

Misurender si Frenilla human nga giingong gihasol sa iyang tanlag.

Balhog na ang suspek sa costudial facility sa Isulan police station samtang magpaabot kanus-a sugdan ang pagtaral sa iyang kaso ngadto sa korte.