ENERO 29, 2019. Tulo ka tuig na ang milabay sa akong paglaag isip usa ka turista sa Mainland China, ang panahon diin asa maoy pagbuto sa coronavirus disease 2019 (Covid-19).

Lab-as pa kaayo sa akong panumdoman nga dihang pag-abot namo sa airport sa Hong Kong, gipanghiling kami pinaagi sa pag-flashlight sa among mga mata, gipanganga ug gikuhaan og body temperature.

Sa paggikan pa namo daan sa akong higalang si Bernabe Balbin sa Pinas, nakulbaan nami kung unsay dangatan sa among paglaag taliwala sa pagbuto sa Covid-19, apan wala kami mahimo, gisayangan pod kami sa among ticket sa eroplano, hinuon wala pa nadeklara sa World Health Organization (WHO) niadtong mga semanaha nga pandemic.

Nalab-as lang sa akong hunahuna ning mga taknaa gumikan kay ming gula ang memories niini sa Facebook post nako, tulo ka tuig ang milabay.

Ang Hong Kong daw anaa sa gatus kilometros, mao na ang Macau, parte sa Mainland China diin niadtong mga taknaa, mao gyod ang pagkusog sa pagtaas sa ihap sa natakbuyan sa maong virus.

Pag-abot pa lang namo sa Hong Kong International Airport, dili basta-basta ang mga thermal scanners, high-tech kaayo nga technology nga misugat kanamo pagnaug sa eroplano gikan sa Iloilo International Airport.

Kampante kaayo ko, dala ang kabalaka ug kahadlok nga basin unya sa sentro nga bahin sa Hong Kong apektado na sab, apan nasayop ko, gumikan gi-sirado naman sab diay sa Hong Kong ang agianan by-land gikan China ug gi-ban na sab ang pagtugpa sa mga eroplano gikan sa maong nasud ngadto sa Hong Kong.

Naka-face mask ang tanan sa Hong Kong, ug nanindog akong balahibo sa akong nakita nga daw sama sa zombie nga salida ug Trip to Busan diha sa among pagsakay og train, naka-face mask tanan, ug isi'g tinan-away, isi'g likay sa kaugalingon.

Kini lagi nga turista ta nianang mga higayona, laag ang naa sa hunahuna, gilibot namo ang mga dapit sa Hong Kong diin asa daghan sab ang mga turista gikan sa nagkadaiyang dapit sa kalibutan.

Pag-uli sa among gi-rentahan nga kuwarto sa usa ka hostel sa Tsim Sha Tsui (TST), ethyl alcohol 70% solution dayon akong gipangita sa akong bag; ug naligo una natulog.

Siyempre matag tunga sa adlaw ko nag-ilis og face mask ug gainom og vitamins, ug mikaon og mga masustansya nga pagkaon, ang resulta, lig-on ang panglawas. Wala gyud nako nabati ang kakapoy, sip-on, labad sa ulo, ubo, hilanat ug pangpangluya, -- kini ang resulta sa pag-amping sa lawas aron dili matakbuyan og bisan unsang sakit.

Labaw sa tanan, ang pagsampit sa Labaw nga Makagagahom ang gikinahanglan, Siya ang makagiya kanato kanunay, dili ta Niya pasagdan kung tim-os gayod ang atong pagtuo diha Kaniya. Ihatag ug ubanan Niya kita, higala.

Mag-amping ug mag-ampo kita mga Dabawenyo nga unta matapos na kining tanan, sama sa nahitabo karon sa Wuhan, China nahuman na sila, sa sentrong bahin sa China, maihap nalang gayod sa kamot ang mga new cases sa matag adlaw. Unta makab-ot na sab nato kini sa dili madugay pinaagi sa hinay-hinay nga pagsabot sa Covid-19 -- sa pagdawat niini sa kaugalingon ug ang pagpabakuna.