ANG nasugatan nga pagsupak sa pagpalambo sa Carbon Public Market sa dakbayan sa Sugbo ngadto sa usa ka world-class nga publikong merkado way kalahian sa mga kanhi sa pag-ugmad sa ubang bahin sa dakbayan nga karon sentro na sa ekonomiya ug nahimong garbo sa Harang Dakbayan sa nasod.
Pipila niini mao ang North Reclamation ug South Road Properties (SRP) nakasugat og mga pagsupak sa ngalan sa pagpanalipod sa kinaiyahan ug kinabuhi sa gagmayng mangingisda. Ang kanhi golf course nga nahimong Ayala Business Park ug kanhi sa Lahug airport nga IT Part na karon gisupak usab sa nagpakabanang grupo.
Dili usab maihap ang mga rali ug protesta tungod sa giingong pagkawani sa mga kabus tungod sa pag-ugmad sa maong mga dapit. Apan karon daghang nagtrabaho tungod sa pag-abli sa daghang estabilisimento nga giakopahan kanhi sa daghang squatters ug tagoanan sa mga badlungong elemento.
Base sa ilang dokumento, ang nakaayo sa proyekto nga pagpalambo sa Carbon Public Market pinaagi kini sa joint venture tali sa usa ka pribadong kompanya, ang lokal mga kagamhanan o katawhan nagpabiling tag-iya sa dapit. Kabahin kita ug benepisyo sa bag-ong merkado nga mosulod sa panudlanan sa dakbayan.
Si Mayor Michael Rama nag-ingon nga gisakyan sa pulitika ang isyu nunot sa nagsingabot ang eleksiyon sa Mayo 9, 2022. Hinuon, maklaro kini sa mga taho kon si kinsa nga indibiduwal o personahe ug mga grupo nga nagpaluyo sa supak nga vendors. Ang ilang mga bulok dili halayo sa nagprotesta batok sa unang mga pag-ugmad sa kalamboan nga karon natagamtaman na sa katawhan.
Sa demokrasya, importante ang papel sa pagsupak. Ang aktibong pagpakabana mobalanse sa sitwasyon apan kon palabihan ug sakyan sa pulitika, dakong hagit kini sa kalamboan.