GIPILO og sobra sa ka-tulo ang gidaghanon sa nangamatay sa third surge sa Delta variant itandi sa fourth surge sa Omicron variant sa Covid-19 atol sa unang buwan sa 2022.

Si Konsehal Joel Garganera, deputy chief implementer sa Emergency Operations Center (EOC), nagkanayon nga 15 ang nakalas sa Delta niadtong tunga-tunga nga bahin sa Hunyo sa miaging tuig.

Apan 45 ang nangamatay sa gituohang Omicron variant sa nakalabay nga walo ka adlaw, 52 sa unang 27 ka adlaw sa Enero.

“In the past 1 week, the number of validated and verified deaths are noticeable. It has an average of 5-6 deaths per day making 45 deaths in 1 week,” matod sa deputy chief implementer.

Si Garganera nitug-an nga sa 45 nga namatay, 29 kanila way bakuna, 11 ang 1st dose nga gikonsiderar nga unvaccinated kun 89% sa nakalas, lima ang nangamatay kun 11% nga bakunado batok sa Covid-19 samtang ang laing pito nga nangamatay wala pa matino kon bakunado ba o di.

Ang konsehal sa north district nagkanayon nga sa panahon sa Delta surge, sa tunga-tunga nang bahin Hunyo nagsugod ang nangamatay sa maong virus.