GIBANA-BANANG di mominos sa P39.2 milyunes pesos ang danyos sa sunog sa APM Shopping Center sa dan A. Soriano, North Reclamation Area, Dakbayan sa Sugbo mga pasado ala 1 sa hapon.
Dul-an sa lima ka oras nga gikombate sa kabomberohan ang kayo tungod sa kalisod sa dapit kay naa sa sulod sa mall ang kayo nagsugod.
Mokabat sa labing minos 70 ka mga establisemento ang apektado sa sunog nga gialarma sa ala 1:52 sa Biyernes sa hapon, Enero 28, 2022, matod ni SFO2 Wendel Villanueva, tigpamaba sa Cebu City Fire Office.
Si Villanueva niingon nga ang sunog nagsugod sa food court sa mall, apan wa pa nila masayri kon unsa ang sinugdanan sa kayo.
Duna silay nakuhang impormasyon nga dunay nag welding sa dapit diin nagsugod ang kayo, apan ila pa kining susihon kon unsa ka tinuod.
Ala 1:54 gisaka sa unang alarma ang sunog. Tungod kay nagsige pa man ang bul-og sa aso, ila nga gisaka sa ikaduhang alarma sa alas 2:46 sa hapon.
Mga tres minutos una mag-usa ka oras pagkumbati sa mga bombero sa kayo, gisaka na usab sa ika tulong alarma mga alas 3:43 sa hapon.
Mga alas 3:43 gideklarar nga under control ang kayo, apan mga alas 6:46 na hingpit nga napawong.
Matod ni Villanueva nga ang iyang mga kauban naglisod sa pagpawong sa kayo tungod kay sa sulod nagsugod ug lisod sudlon.
Gawas nga baga ang aso, init usab kaayo sa sulod sa building.
“Ato tong gigamitan og breathing apparatus kay ang sa sulod kusog kaayo ang aso.Wala ka gawas ang kayo mao na nga naglisod atong mga bombero,” matod ni Villanueva.
Kini ang hinungdan nga hapit molima ka oras una pa hingpit nga napawong ang kayo.
Nag-abang sa mall ang mga kan-anan, mga tindahan sa cell phone accessories, dental clinic, banko, camera shop, tunghaan sa driving ug uban pa.
Ang edipesyo nga nasunog gipanag-iyahan sa APM Mall/Fengting Lu/Chung/Golden Heartland Properties Corp.
Samtang si Cebu City Mayor Mike Rama niduaw sa fire scene.
Siya nimando sa kabomberohan nga seguraduhon nga way mangawala nga mga gamit sulod sa mall.
Si Rama nakigsulti sa tenants ug mga kawani human sa iyang pagsusi sa kadaut.