“I Parik?it Maharaja disan na ing pangakabus o kaligtasan pauli ning pamakirandam at i Sukadeva Goswami tinggap na ing pangakabus kapamilatan ning pamigale karing Banal a Lagyu. I Prahlada Maharaja disan na ing pangakabus pauli ning pamiganaka o panalala king Ginu. Ing Diwata ning Kapalaran, Lak?midevi, ikwa na ing kapantasan kapamiltan ning
pamanyamba karing malatukal nang bitis ning Ginu. I P?thu Maharaja naman disan na ing kaligtasan kapamilatan ning pamanyamba king Nwan a Larawan ning Ginu. I Akrura mikabus ya kapamiltan ning pamagdaun pangadi, I Hanuman kapamilatan ning pamanampang kasuywan, I Arjuna kapamilatan ning pamitatag pamikaluguran king Ginu, at i Bali Maharaja kapamilatan ning pamagdaun king segana-gana king pamanyuyu na king Ginu.”
Deni ila ring Syam a Paralan ning Makatagulaling a Kasuywan
Lalarawan na la kening Prahlada Maharaja king ka-7 Dake ning Srimad Bhagavatam anti king makatuki:
Para dandaman ya ing Nwan a Lagyu ning Panginwan, ing Aske Na, ing Panugali Na, ding pibandayan Na, and ding dapat a katulan Na, at bang dandaman at igale la reti, ing ganakan la, suywan la ring tukal nang bitis ning Ginu, bang magalang a midaun kasuywan king Ginu, bang miyampang dalangin king Ginu, bang maging talasuyu Na, bang ituring Yang metung a Kakaluguran ing Ginu, at miyampang Kaya ing sabla – deting syam a paralan matatanggap la bilang dalise makatagulaling a kasuywan.
1. PAMAKIRANDAM (sravanam) I Aring Pariksit (karing tawling pitung aldo ning keyang bye, parati ne yang pekirandaman Srimad Bhagavatam).
2. PAMIGALE o PAMAGDALIT (kirtanam) I Sukadeva Goswami (sinabi ne ing Bhagavatam kang Aring Maharaja Pariksit)
3. PAMIGANAKA (visnu smaranam) I Prahlada Maharaja (e ne kelingwan ing Ginu agya man pane neng paparusan ning ibpa nang i Hiranyakashipu)
4. PAMAGSUYU KARING TUKAL NANG BITIS NING GINU (pada sevanam) I Laksmi, ing diwata ning Kapalaran, parati yang makasuglung king pamanyuyu karing tukal nang bitis ning Ginu.
5. PAMANYAMBA KARING LARAWAN NING GINU (arcanam) I Maharaja Prthu ginamit na la ngan ding keyang pibandyan anting ari bang idaun na la ngan king dalise pamiyampang king Ginu.
6. PAMANGADI (vandanam) I Akrura miyampang yang dalangin king Ginu inyang maglakbe ya papunta king Vrndavana bang pakikitan na Ya I Krsna.
7. PAMANUPAD KARING UTUS (dasyam) I Hanuman, ing matalik nang talasuyung Ramacandra gimpanan na la ngan ding utus nang Sri Ramacandra sumangid ding miyayaliwang kasakitan a delanan na.
8. PAMANYUYU ANTING KAKALUGURAN (sakhyam) I Arjuna bina yang malapit kang Krsna, inya inampang ning Ginu a yang magpapulayi king karuwayi na at suywan ya I Arjuna at ding kapatad nang lalaki karing miyayaliwang paralan.
9. LUBUSANG PAMANYUKU (atma nivedanam) I Bali Maharaja pigkalub ne kang Sri Vamanadeva ing mabilug nang kayaryan, ding pibandyan na, pati na katawan na, agya mang ing sarili nang guru salang ya kaniti.
Nganang Prahlada Maharaja: “Ing pamakirandam at pamigale karing Nwan a Lagyu, aske, panugali, kasangkapan, at dapat a katulan ning Ginu, gaganakan la, susuywan la ring nwan nang bitis ning Ginu, miyayampang magalang a pamanyamba king Ginu, a ating labing anam a kasangkapan, pamanampang dalangin king Ginu, pamaging talasuyu Na, pamituring king Ginu bilang pekamatalik a kakaluguran, at pamanyuku king segana-gana Keya, katawan, isip at amanu,—deting syam a paralan tanggap la anting dalise makatagulaling a kasuywan king Kakataskatasang Ginu. Ninu man ing miyampang king bye na king kasuywan king Ginu makikilala ya bilang pekabyasang tau, uling menikwa yang lubusang belwan.”
***
Dake Talabaldugan:
1.mikulayan (pangdiwa) midampulan, mikulen, mirinan o misamutanang dampul o kule, rusing, e sasaryan o e binalak. English – colored or given, applied color, hue, or tint on something. Alimbawa king pamangamit: “Neng misanggayid ya ing imalan nang kasulud-sulud pa keng kulumanas uyta mirinan yang iro dampul.”
2.mikulen (pangdiwa) makuyad a aske ning miikulayan, midampulan, mirinan o misamutanang dampul o kule, rusing, e sasaryan o e binalak. English – colored or given, applied color, hue, or tint on something. Alimbawa king pamangamit: “Mikulen e mayap ing pamanagal na ngeni agnan ning kamaganak na uling bala da ila namung byasa king pamanungkulan deng mikapatad ngara ding magsisti”
3.mikulikat (pangdiwa) mibuknul padurut, kinulikat e sasaryan o e binalak. English – got entangled in a circular manner on something or someone. Alimbawa king pamangamit: “Mikulikat ya kanu ing sarili nang pusad ning bayung sapwak a pungul inya bala da mate ne uling kule yang abung linwal king pangasakal na.”
4.mikulung (pangdiwa) mesukul pauli ning sala king batas; medakap pauli ning pangalub king patibung. English – jailed, imprisoned; confined in a reformatory; arrested due to crimes or illegal deeds committed Alimbawa king pamangamit: “Mikulung ya i Elang agyang ala ya rugung sala at angga man ngeni agyang alang masalese saksi e ya pa mu rin miyatulan.”
***
MIKASING-KABALDUGANG AMANU TAMU
Deni ring mepiling amanung mikasing-kabaldugan king aldo iti:
Salunan – metung a tau o kaladwan o tanaman a daralan sakit.
Manamdaman – metung a tau o kaladwan o tanaman a daralan sakit king katawan, kapanamdaman, isip.
Masakit – metung a tau o kaladwan o tanaman misasakitan pauli ning e mayap a kabiylan ning katawan, kapanamdaman o isip.
PANAGKAT: Nung atin pung mekalingwan, melakto, kulang o mali karing amanung megamit?pakisulatanan o pakitext o call ing Kapisik. Pisopan-sopan tamu ing belwan.
Dakal pung salamat.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.