Inahan ug anak nangaangol human sila gipana sa ilang silingan nga hubog atol sa karambola alas 7:30 sa gabii sa Biyernes, Enero 28, 2022 sa Purok Santan, Brgy. Anopog, lungsod sa San Remegio, amihanang Sugbo.
Samdan ang mga biktimang sila si Consolacion Lopez, 70, minyo, ug iyang anak nga si Alvin, 37.
Si Consolacion naigo sa tuong paa samtang si Alvin naigo sa tuong bukton.
Hinuon, nasikop ang ilang silingan nga si Beltran Demicillo, kinsa samdan human usab pusila ni Alvin dihang gipasan usab siya.Tungod niini, apil usab siyang gidakop sa kapulisan.
Gidakop si Demicillo ingon man sila si Alvin ug bayaw nga si Julito Abaño.
Si Police Staff Sgt. Felipe Cabague, Jr., sa San Remigio Police Station nga nahinabi sa Superbalita Cebu nagkanayon nga hubog si Demicillo.
Si Demicillo nanulong og inom sa panimalay ni Julito Abaño, diin didto sab miapil sa pagtagay si Alvin.
Nagkalalis sila si Demicillo ug Alvin dihang nangahubog na.
Si Demicillo gikatahong nanghagit kang Alvin, kinsa nanukmag dayon sa suspek.
Naigo sa wala nga mata si Demicillo, kinsa niibot usab sa iyang dala nga kutsilyo aron unta dunggabon si Alvin.
Ang bayaw nga si Abaño nga nakakita daling mitabang kang Alvin, hinungdan nga mikaratel sa pagdagan si Demicillo ug nisulod sa ilang balay.
Sila si Abaño ug Alvin mikuhag mga bato, gilabay ang balay ni Demicillo nga naguba human maigo sa dagkong mga bato.
Sa kalagot ni Demicillo, nigawas kini nagdalag pana ug dihang nakabantay, sila si Abaño ug Lopez nang-atras.
Si Consolacion naabot, niduol kang Demicillo aron mopatunga sa away, apan gipana siya niini.
Si Alvin nga nakakita nga naigo iyang Inahan, daling mitabang, apan siya na sab ang gitiruhan.
Si Alvin nga duna diay armas, nipusil kang Demicillo, kinsa na-igo sa toong paa.
Ang mga biktima ug mga suspek pulos nangalandig sa tambalanan sa dakbayan sa Bogo.
Narekuber sa kapulisan ang .357 caliber revolver, usa ka buhing bala, duha ka mga kabhang, pana ug kutsilyo.