Alang sa mga sakop sa Carbon Alliance, dakong fake news ang nabalita nga na-dismiss ang kasong gisang-at aron mabasura ang Joint Venture Agreement (JVA) tali sa Cebu City Hall ug ang Megawide.
Fake news usab ang niguwa nga napabalhin na ang 700 ka mga Carbon vendors ngadto sa Interim Market.
Apan, posible sab baya gyud nga nagdanghag lang ang nagsulat ug nag-edit sa balita. Kay hangtod karon, pending man ang kaso batok sa JVA. Ang na-dismiss mao lang ang hangyo sa korte nga mo-isyu og temporary restraining order.
Dayon, pila ray pag-adto sa Carbon aron pagsusi kon nabalhin na ba gyud ang 700 ka vendors.
Simple kaayo nga mga buhatunon aron ma-maintain ang credibility sa mga mantalaan. Apan, nagdanghag ug nagtinapulan kaha ang mga responsable.
Di ko motuo nga tungod kini sa magic sa Megawide. Di man pareho ang mga magsusulat sa mantalaan ug kining mga konsehal nga mopirma dayon og kontrata bisan og wala makabasa. Mas dunay dignidad ang mga magsusulat.
Di man pareho ang mga magsusulat ug kining mayor nga nausab ang baruganan kon itandi niadtong mga bulan nga bise mayor pa siya.
Nasiguro ko nga moangkon kining mga mantalaan nga nasayop ug mangayo og pasaylo. Dili kini sila pareho ug mga politiko nga magpabaga lang og pamakak.
Bakakon
Sa nasyonal nga politika, nakahibawo na man kita kinsa kining kandidato alang sa pagka presidente nga di gyud moangkon nga nangawat ang diktador nga si Ferdinand Marcos sulod sa duha kapin nga dekada.
Matod pa, di makig-zoom sa Comelec kay gi-Covid 19. Apan dali kaayong nakabiyahe sa Sugbo kay bunyag sa apo ni Gob. Gwen Garcia.
Di lagi siya kuno mangatake sa kaatbang. Apan basaha ang mga komentaryo sa iyang mga troll. Grabing makapamasangil og mga bakak.
Lalim bay, hasta pag-usab sa color ngadto sa pink gihimong isyu. Grabi na silang makapamalikas. Apan di gyud mohisgot sa record nga pangawat, sa pagka tax evader, ug uban pa.
Tinuod
Giimbitar ko og usa ka museu dinhi sa Sugbo nga moistorya kabahin sa mga panghitabo dinhi sa Sugbo kaniadtong panahon sa diktador. Kabahin kini sa kasaulogan karong Pebrero sa Edsa 1, ang People Power Uprising.
Ako unyang hisgutan sa sunod nga mga lindog ang detalye sa maong kalihokan aron ang gustong maminaw makahigayon.
Wa ko maanad og istorya atubangan og mga tawo. Makahinumdom pa ko nga mamuwa diha atubangan sa klase ug molingkod na lang nga walay natabi. Pasulata lang lagi ko.
Apan karon, nakita nako nga ang paghisgot sa tinuod usa ka dakong responsibilidad sa akong henerasyon. Kini taliwala sa dakong bakak nga giduso sa mga nadala sa sayop nga impormasyon kabahin sa diktadurya ni Marcos.
Samot pa nga gidawat nako sa miaging tuig ang dakong responsibildad nga mag-convenor sa Sugbo sa Campaign Against the Return of the Marcoses and Martial Law kun Carmma.
Pakigbisog
Karong bag-o, grabi ang panagsangka sa mga grupong anti-Marcos ug mga tigpanalipod sa anak sa diktador nga si Marcos Jr.
Nakita nako sa usa ka simpleng post sa Facebook sa Superbalita Cebu kining pagtaod og tarpaulin sa mga supporters ni Vice President Leni Robredo. Apan gidagsangan kini sa daghan kaayong mga tigsuporta ni Marcos Jr. ug nanukol ang mga anti-Marcos.
Unsaon ta man nga nisulod man ko sa maong pakigbisog. Makigbisog, Ayaw Kahadlok! (DM nako sa @anol_cebu)