GIKUWESTYON sa presidente sa Association of Barangay Councils (ABC) Lapu-Lapu City, Konsehal Eduardo Cuizon ang pagdumala ni Mayor Junard Chan sa mga Oponganon human niigo ang bagyong Odette.
“Buot bang ipasabot nga palpak siya sa iyang gihimo?,” kuwestiyon ni Bankal barangay kapitan Cuizon atol sa gipatawag nga press conference niadtong Enero 27, 2022.
Apan si Mayor Chan miklaro nga adunay pipila ka mga kapitan nga ‘uncooperative’ nga wa mohimo og survey sa ilang konstituwente nga angayan hatagan sa P5,000 nga financial assistance.
Ginganlan sa mayor ang Barangay Bankal nga wa mohimo og survey ug matod pa gitagoan ang survey sheet hinungdan nga ni-take over ang Task Force Bangon Oponganon nga maoy gitahasan sa paghimo og assessment sa mga balay nga nangaguba sa bagyo.
Ang press conference sa ABC gitambungan sa mga barangay kapitan nga naglangkob nila ni: Evaristo Dihayco (Mactan), Arsenio Berdin (Babag), Rusell Abing (Maribago), Ranilo Abatan (Caohagan), Arselito Pejo (Calawisan), Reynaldo Tampus (Canjulao), Joselito Tibon (Suba Basbas), Johanna Capangpangan (Pajac), Mary Jane Cahilog (Ibo), Gina Soroño (Buaya), Eleonor Fontanoza (Gun-ob), Regina Ybañez (Looc), ug Triponia Abayan (Tungasan).
Gisalikway sa maong mga opisyal ang naunang pamahayag sa mayor nga wa makig-alayon ang mga barangay opisyal ilabi na sa pagpang apud-apod sa financial assistance alang niadtong naapektuhan sa bagyong Odette.
Ug gibasol hinungdan nga nalangay ang distribution sa financial assistance.
'UNFAIR'
Lakip na ang pasangil nga wa magpakabana ang mga barangay opisyal ngadto sa ilang mga konstituwente human sa pagkuso-kuso sa bagyo.
Gihulagway ni Kapitan Regina Ybañez, Looc nga unfair ang giluwatang pasangil ni Mayor Chan.
“Tingali maong nakaingon siya ana nga way gihimo, kay way mayor nga niduaw sa Barangay Looc. Way mayor nga nangumusta (human sa bagyo),” yawyaw ni Ybañez.
Gibutyag ni Cuizon nga sila nga mga barangay opisyal maoy nipakaon sa evacuees sa bagyo sulod sa tulo ka adlaw kay matod pa wa gilayon makapadala og ayuda ang taga City Social Welfare and Development Office (CSWDO).
“Three days after (bagyo) pa sila nagpadala sa food packs,” asoy ni Cuizon.
LISTAHAN MANAGLAHI
Usa sa gireklamohan sa maong mga opisyal mao nga wa tahura ang ilang gihimong lista alang niadtong indigents nga makadawat sa P5,000 nga financial aid.
Ang Barangay Mayor’s Office (BMO) nga gitudlo sa mayor nihimo og linain nila nga listahan sa beneficiaries nga wa magtukma ang gidaghanon.
“Among lista 1,775 ka household. Unya 1,972 (household) ang ilang lista nga way pirma sa kapitan,” saysay ni Kapitan Arselito Pejo, Calawisan.
Gikuwestiyon sa mga kapitan nga mas gihatagan og gibug-aton sa mayor ang lista sa BMO inay ang ilang gihimo nga mi-survey ug miila niadtong beneficiaries nga angayang makadawat sa ayuda.
TRABAHUON GISALO
Si Mayor Chan nibutyag nga adunay mga kapitan nga wa mokooperar sa paghimo og verification o survey ngadto sa mga pamilya nga nagub-an og balay human sa bagyo.
“Wa buhata sa uban nga mga barangay, ikaw nga amahan, ikaw nga mayor unsa may imong buhatan? Gibuhatan nakog assessment on the very first day of the verification. Ang nahitabo wala mohatag, gibutang lang sa daplin, gipasagdan,” pamahayag sa mayor.
Matod ni Chan, tungod kay dinalian ang panginahanglan hinungdan nga gisawo sa siyudad ang trabahuon aron nga maapud apod na gilayon ang calamity fund.
Iya sab nga gitataw nga adunay “check and balance” nga gihimo gawas sa mga kapitan nga mohimo sa assessment adunay taga Task Force Bangon Oponganon nga mo-verify sa maong listahan.
Atol niining pagsuwat gihimo ang second wave sa pagpang apud-apod sa financial assistance, moabot na ngadto sa 98,000 ka household ang nakadawat sa ayuda sukad gisugdan ang distribution niadtong Enero 21, 2022.
Subli nga nanawagan si Chan sa mga kapitan nga ihiklin ang pamolitika ug ipatigbabaw ang pagtinabangay ilabi na laing pagsuway human miigo ang katalagman.