HAPPY New Year sa kaigsuonan natong Insik.

Karon, atong pagasaulogon ang Lunar New Year nga gitawag sab og "Year of the Water Tiger." Gihatagan na ko ni Amado So og tikoy busa niambit na ko sa ilang kasumaran.

Niadtong niaging semana, atong nasaksihan ang daghang kalihukan sa atong mga kandidato kay hapit na ang adlaw sa pangampanya sa nasudnong posisyon.

Niabot dinhi sa siyudad ang pipila ka nidagan pagka-senador. Niadtong Enero 27, niabot si Senador Bongbong Marcos aron pormal nga ablihan ang ilang headquarters sa may RMC Gym ug sa Eon Towers kauban si Mayor Sara Duterte. Bisan sa gipakanaug nga mando sa dili pagtapok sa mga tawo tungod sa hadla sa Covid-19 Omicron variant, dili mabangbang ang kadaghan sa tawo nga misaksi sa maong kalihukan.

Ang uban gikan pa sa lagyong lugar sa Mindanao aron lang masud-ong sa ilang idol.

May daghang mga kandidato nga gusto magpalitrato uban ni BBM ug Sara aron ilang himuong poster apan nakawang lamang tungod sa kahugot sa seguridad.

Ang uban niuli na lang nga luhaan ug nagutman kay wa matuman ang ilang damgo. Hinuon, ing-ini man gyud ning panahon sa kampanya. Daghang malipay ug mas daghan ang masilo ilabi na kadtong maghandom nga makakuwarta gikan sa ilang mga idol. Apan lahi gayud karong panahona nga daghang gibawal sa Comelec ug IATF nga gipahamtang sab sa DILG. Apil na niini ang dagkong panagtapok, paglamano ug biso-biso sa katawhan ug pagpanghatag og pagkaon nga sagad natong masaksihan sa panahon sa kampanya.

Sa laing bahin, nikusog sab ang broadcast sa TV ug radyo kabahin sa baruganan sa mga kandidatong nasyonal sa dagkong isyu sa katilingban.

Ang usa ka nindot nga gihisgutan mao ang baruganan sa nagpapili nga presidente sa isyu sa West Philippine Sea ug sa gitawag nga "Foreign Policy."

May mga kandidato nga gustong pugson gyud ang China sa pagsunod sa mando sa "International Tribunal on the Law of the Sea." Apan may pipila nga nag-ingon nga ipatigbabaw nato ang diplomasya ug malinawong pagkighinabi sa China.

Para kanako, sakto ang linya nga "independent foreign policy" sa Duterte Administration. Buot ipasabot niini nga wala kitay gidapigan nga higanteng nasud nga maoy modominar sa direksiyon sa atong nasud.

Gusto nato nga higala nato ang tanang nasud ug dili kita moapil sa away sa higanteng nasud sama sa US, China ug Russia. Karon ra kini nahitabo sa panahon ni PRRD nga halos tanang nasud buot motabang nato.

Sa isyu sa Covid-19, daghan kaayo kitang nakuhang bakuna sa lain-laing nasud sama sa Astrazeneca sa UK, Moderna, Pfizer ug Johnson & Johnsons sa US, Sinovac ug Sinopharm sa China, Sputnik V sa Russia ug uban pa. Kung nagpadayon tingali kita nga nagpa-itoy sa US, hayan ang Pfizer ug Moderna ra ang moabot sa atoa.

Mao usab kini ang baruganan sa usa ka kandidato nga mangita kita'g paagi nga mahimong produktibo ug makaangkon og "win-win solution" ang isyu sa West Philippine Sea. Unta mao kini ang baruganan sa sunod nga presidente.