Gang war sa mga batan-on mikalas og usa ka kinabuhi, human kulataha sa tulo ka mga menor ug dunggaba sa usa nila, kinsa nagpanuigon og 14 ug 15 anyos, ang 16 anyos nga lalake atol sa karambola alas 10:15 sa gabii sa Dominggo sa Carcar City New Plaza, Brgy. Poblacion 3, dakbayan sa Carcar.
Si Clark Rivera, 16, taga Sitio Lower Tawog, Brgy. Valladolid, dakbayan sa Carcar, patay nang nidangat sa tambalanan sa dakbayan sa Carcar.
Nasikop sila si Warine,15, taga Sitio Luan-luan, Brgy. Poblacion 1; silingan nga si Daryl, 14; ug Winston, 15, taga Sitio Cambuntan, Brgy. Bolinawan Carcar.
Ang mga suspek pulos mga sakop sa Kalmados gang.
Samtang gisubay sab sa kapulisan ang giingong grupo ni Rivera.
Si Police Lt. Col. Ardioleto Cabagnot, Jr., hepe sa Carcar Police Station nga nahinabi sa Superbalita Cebu, nagkanayon nga gang war maoy motibo sa kremin.
Matod ni Cabagnot nga ang grupo nila ni Rivera ug mga suspek taudtaud na nga nagkabangi.
Sa ilang nakuhang impormasyon sa mga suspek, usa sa ilang kauban nakulatahan sa grupo ni Rivera.
Si Rivera nisuroy sa plaza uban sa iyang grupo nakit-an sa mga suspek, ningduol sila, ilaha dayon nga gitabangag sumbag si Rivera.
Nahitabo ang lamoklamok sa mga batan-on, si Winston niduol kang Rivera, kalit nga midunggab s biktima gamit ang icepick.
Si Cabagnot niingon nga 200 metros lang ang gilay-on sa kremin gikan sa ilang estasyon sa kapulisan.
Sumala pa niya nga nadakpan gilayon sa iyang mga sakop ang mga suspek.
Gibutyag niya nga ang grupo sa mga batan-on gipapauli na nila kay curfew, apan wala sila magdahom nga sa kalit magkarambola.
“Wa ta magdahom nga duna diay silay grupo, unya daan nang atraso, mibawos ning mga suspek,” dugang ni Cabagnot
Narekuber nila ang 12-inch ice pick, lakip sa handle.
Si Cabagnot, miingon nga dunay usa ka 18 anyos nga mi-surrender apan ila pang giimbestigar.
Ang mga suspek kasamtangan nila nga giduso nila sa Dept. of Social Welfare and Development (DSWD).