Nagbangutan na sad ang pageant world sa kamatayon sa laing beauty queen. Si 2019 Miss USA ug abogadang si Cheslie Kryst niambak gikan sa iyang gisak-ang condo niadtong Dominggo nga gituohang naghikog tungod sa depression. Ang nahitabo ni Cheslie ug kining inyong mabasa karon maoy pipila lang sa mga pinaka-shocking nga kamatayon sa mga beauty queen ug modelo nga padayong mihamok nato hangtod karon.
MARIA TERESA CARLSON / Facebook Hangtod karon nagpabiling tanghaga ang kamatayon sa beauty queen-actress nga si Maria Teresa Carlson, kinsa natawo sa Manila apan nidako sa San Francisco, California. Si Carlson nga nakoronahang 1979 Miss Young Philippines giingong biktima sa domestic violence. Apan gi-deny ni sa iyang bana nga si kanhi Ilocos Norte Gov. Rodulfo Farinas. Si Carlson namatay human gingong niambak ni sa balcony sa 23rd floor sa iyang gipuy-ang condo niadtong November 23, 2001. Si Carlson ang nagpasikat sa linyang "Si Ako, Si Ikaw" sa kanhi hit sitcom Chicks to Chicks.
ROSEMARIE FRANKLAND / Wikipedia Ang Welsh actress, model ug beauty queen nakit-an nga wala nay kinabuhi sud sa iyang lawak nga gituohang tungod sa drug overdose niadtong December 2000 sa Marina del Rey, California. Si Rosemarie dunay gihambin nga depression. Una siyang nidaug nga first runner-up sa Miss Universe 1961 ug nakoronahan usab nga Miss World niana usab tuiga. Namatay siya sa edad nga 57.
CSILLA MOLNAR / beautypageants.indiatimes.com Nag-edad lang og 17 niadto si Csilla Molnar dihang nakoronahan siyang Miss Hungary niadtong 1985. Apan July 10, 1986 naghikog ni pinaagi sa matod pa pag-inom og “lidocaine.” Pila ka semana sa wa pa ang hitabo giingong nagmirida na ang beauty queen atol sa radio interview. “I don’t know whether I can bear this, everybody is harassing me. They (people) ask: where and from whom did you get those beautiful clothes? Who helped you? Do you or your father have special connections with the jury? And so on”.
VIVEKA BABAJEE / beautypageants.indiatimes.com Pamilyar tingali mo ni 1994 Miss Mauritius Universe ug actress nga si Viveka Babajee nga mahinumdoman sa iyang linyang “take it, take it” nunot sa nahitabong eskandalo sa 1996 Metro Manila Film Festival awards night. Niadtong June 25, 2010 si Viveka nakit-ang nagbitay sa ceiling fan sa iyang apartment sa Mumbai. Usa ka buwan sa wa pa ang hitabo giingong nanawag pa ni sa iyang mama ug nananghid, “I am going far away”. Si Viveka giingong dunay “acute depression.”
NAFISA JOSEPH / beautypageants.indiatimes.com Si Miss India Universe 1997 Nafisa Joseph nagpakamatay sa edad nga 26 pinaagi sa pagbitay niadtong July 29, 2004. Si Nafisa nakoronahan nga Miss India sa edad nga 19. Ang maong beauty queen giingong na-depressed human wala madayon ang iyang kasal human iyang nadiskubre nga dako pang minyo ang lalake sukwahi sa gipasiatab niining divorced na.
HELENA BELMONTE / Facebook Ang American-born Filipina model ug socialite nga si Helena Belmonte gituohang niambak sa gipuy-an niyang 23-storey condo sa Meralco Avenue, Pasig niadtong Marso 20, 2014 sa edad nga 28. Teenager pa lang dihang nigawas siya sa mga commercial ug nahimong cover sa mga magazine. Nisuway usab siya og acting career ug nikuha og kurso sa New York Film Academy. Gikumpirmar sa iyang pamilya nga dunay bipolar disorder si Helena.