Talandugon ang kahimtang sa 17 anyos nga lalake human gidunggab sa uyab sa iyang gipamisitahang dalaga sa Barangay Poblacion, lungsod sa Compostela niatong Martes, Pebero 1, sa alas 12:45 sa kaadlawon.
Ang biktima mao si Roñan Boy Lagoras, 17, estudyante, taga Barangay Catarman, lungsod sa Liloan.
Nadakpan sa follow-up operation sa kapulisan si Jissielo Canen, 20, ulitawo, electrician, taga Barangay Cabadiangan, Compostela.
Si Patrolman Renan Relampagos sa Compostela Police Station, nagkanayon nga ang biktima nakaangkog duha ka samad mga dinunggaban sa iyang buko-buko.
Naabtan ang biktima hinungdan nga gibanghagan ug nagdali og gawas ug nisakay sa iyang bisiklita.
Ang suspek nisunod nagsakay sa motorsiklo ug naabtan ang biktima, gidunggab sa bukobuko sa makaduha ka higayon gamit ang gunting.
“Selos ang motibo naglagot ning suspek kay naabtan niya ang biktima didto sa sulod sa lawak sa iyang uyab,” dugang ni Relampagos.
Ang suspek niangkon sa krimen gumikan sa iyang kalagot.
Si Canen pwerting sukoa kay nag-uban pa sila nianang adlawan sa iyang 17 anyos nga uyab ug nisamot kasuko dihang naabtan niya si Lagoras sa lawak sa iyang uyab.