Mag-uuma patay human nakigpinusilay sa mga pulis dihang nag-wild sa Sitio Mahayahay, Barangay Tabunan, lungsod sa Borbon niadtong Martes, Pebrero 1, alas 11:35 sa gabii.
Si Michael Mangubat Casas, 42, minyo ug nagpuyo sa nahisgutang lugar, namatay sa tambalanan sa lungsod sa Sogod sa alas 3:27 sa kaadlawon sa Miyerkules, Pebrero 2.
Si Police Lt. Derrick Inot, hepe sa Borbon Police Station nga nahinabi sa Superbalita Cebu, nagkanayon nga ang asawa sa suspek nga si Cristyl, nangayo og panabang sa ilang buhatan.
Sumala sa asawa nga online seller, ang iyang bana naghuramentado sa wala matino nga hinungdan ug gipusil ang iyang ig-agaw nga si Lezel Donaire Cantones, 35, apan wala kini maigo.
Gikulata si Leoncia Delgado, 69, inahan ni Cristyl ug ugangan sa suspek ug ang ilang 15-anyos nilang anak nga si Benjie nga person with disability (PWD).
Si Cristyl unang nakadagan human nakamatikod sa laing linihokan sa bana.
Asoy sa asawa ngadto sa kapulisan, ang iyang bana nilakaw niadtong Martes, Pebrero 1, sa hapon sa bukirang dapit nga wala masayri kon unsay tuyo sa dapit.
Niuli sa pagkagabii ug nidiretso sa pagsulod sa lilang awak nga masuk-anon ug nagyawyaw og 'Linatin'.
“Nakabantay ang asawa nga nausab ang linihukan sa iyang bana, lahi na kaayo kay nagyawyaw nga dili masabtan,” matod ni Inot.
Nakalitan ang pamilya kay dili kini palahubog ug lahi ang gipakita nga kaisog.
Dugang sa pulis, nahadlok ang asawa sa kaisog sa tingog ug siga kaayo og mata sa bana hinungdan nga nagpakaaron-ingnon siya nga mangihi sa pansayan.
Dihang nakagawas sa lawak, nikaratil siya pagdagan ug nitago ngadto sa ilang silingan nga iyang paryente.
Niadto sa panimalay ni Cantones si Michael ug nangita kang Cristyl. Dinhi nagsugod sa paghuramentado, sumala sa kapulisan, nagpabuto kini sa iyang armas.
Gikataho nga naglagot nga wala makit-i ang asawa, iyang gipusil si Cantones apan wala kini maigo human abtik nga nakadagan ug nakatago.
Dugang saysay sa kapulisan nga si Michael niuli ug gikulata ang iyang ugangan, gipisok ang mata ug gilampormas sa gawas sa balay.
Ang iyang 15 anyos nga PWD nga anak gikulata usab.
“Pag-abot sa akong mga personnel, namawong sa suga ang suspek. Pagduol nila namusil, nabawsan ug naigo sa lawas,” matod ni Inot.
Matud ni Inot, ang suspek diha sa gawas sa balay naghupo likod sa kahon sa soft drinks.
Dason ni Inot, maayo na lang kay sa pagpamusil sa suspek walay naigo sa mga pulis.
Ang samdan nga suspek gidala sa kapulisan sa tambalanan sa Sogod apan nabugtoan kini sa kinabuhi sa pagkakaadlawon.
Si Inot nipadayag nga ilang estoryahon pagbalik ang asawa sa pagsubay kon wala ba mag-apil-apil sa pagka tambalan si Michael human nga ilang unang nasayran nga hilumon ug dili moinom sa ilimanon makahubog hinungdan nga nahibulong kaayo ang pamilya sa iyang mga lihok.
Ang kapulisan nakarekuber sa crime scene sa usa ka unit caliber .45 Colt pistol, nga dunay duha ka buhing bala, usa ka kabhang ug magazine.
Si Inot niingon nga andam silang motubag sa imbestigasyon bahin sa kamatayon ni Michael.