Konsehal sa barangay patay human nahulog ang iyang gimaneho nga mini dump truck sa 17-ka-tiil nga gilawmon sa pangpang sa national highway sa Barangay Lugo, lungsod sa Borbon niadtong Miyerkules, Pebrero 2, alas 12:10 sa udto.
Si Rubin D. Hatamosa, hingkod, minyo, negosyante ug barangay konsehal sa nahisgutang lugar, dead-on-arrival (DOA) sa tambalanan sa lungsod sa Sogod tungod sa grabeng kadaut sa iyang lawas sa impact.
Si Police Lt. Derrick Inot, hepe sa Borbon Police Station nga nahinabi sa Superbalita Cebu, nagkanayon nga si Konsehal Hatamosa, mag-deliver unta sa order nga bas ug ubang construction materials.
Ang iyang mini dump truck gi-park sa sa kilid sa iyang tindahan nga dunay bag-ong nahuman nga riprap sa daplin sa national highway.
Sumala ni Inot, dihang gipaandar na ni Hatamosa ang sakyanan, kalit kining niatras hinungdan nga nahagbong sa 17-ka-tiil nga pangpang ug nabalintuwang sa paghagsa sa ubos.
Napiit ang konsehal sa manubela ug dason ni Inot, nilungtad og tunga sa oras ang pag-ugkat sa mga rescuer uban sa pag-abag sa mga silingan ug kabanay.
“Daplin ra kaayo parking area sa pangpang. Duda namo, naka-engine (nakakambyo paatras) na daan dihang gipa-andar (busa) kalit nga mi-atras, unya naratol ni siya. Diretso kabulintang (ang) dump truck, pwerte niyang pagkapiit,” dugang ni Inot.
Nigamit og tractor ang mga rescuer, kabanay, silingan ug nagtinabangay aron madali kini pero DOA gihapon sa tambalanan.
Sumala ni Inot, sa kakusog sa impact sa pagkabulintang sa dump truck, nakaangkog grabing kadaot sa lawas ang drayber nga konsehal.