GIAPRUBAHAN sa Philippine Basketball Association (PBA) board of governors kagahapon, Pebrero 4, 2022, ang hangyo sa Samahang Basketbol ng Pilipinas (SBP) nga mohuwam og pipila ka mga magduduwa sa TNT Tropang Giga alang sa umaabot nga tahas sa Gilas Pilipinas.
Nagkanayon si PBA chairman Ricky Vargas nga wala’y bisan usa ka sakop sa board of governors ang nisupak.
Ang Gilas Pilipinas nagkinahanglan og dugang haligi alang sa ilang kampanya sa February window sa 2023 FIBA World Cup Asian Qualifiers nga ipahigayon sa Pilipinas.
“I’m very pleased to say that the PBA once again will adjust its schedule to allow some players from TNT to play with Gilas not only during the window but also during the practice,” batbat ni Vargas.
“It was a unanimous decision.”
Ang Gilas Pilipinas makigbatok sa South Korea karong Pebrero 24, 2022 dayon ikasangka nila ang India inig ka sunod adlaw. Karong Pebrero 27, sangkaon sa Gilas Pilipinas ang New Zealand.