KRITIKAL ang kahimtang sa usa ka manager sa usa ka kompaniya human gipusil sa wala mailhing gunman sa alas 8:30 sa gabii niadtong Huwebes, Pebrero 4, sa Sitio Kamanggahan, Barangay Buanoy, lungsod sa Balamban.
Si Fredly Alcansare, 33, ulitawo, manager sa Glocal Research Trading,nagpuyo sa nahisgutang lugar, naa sa talandugon nga kahimtang nga gidala sa tambalanan sa dakbayan sa Sugbo human maigo ang apapangig sa pagpusil.
Si Police Master Sgt. Alby Agua, imbestigador sa Balamban Police Station, nagkanayon nga wala pa silay matumbok nga nihimo sa krimen ug motibo.
Sumala ni Agua nga si Alcansare nag-inom sulod sa ilang balay uban sa barkada nga si Jason Pedrano, 23, ulitawo ug kalit nga milanog ang sipang buto sa armas ug natumba si Alcansare nga naigo sa wala nga apapangig.
Gidali sa pagdala sa tambalanan sa lungsod sa Balamban si Alcansare, apan gibalhin dayon sa ospital sa dakbayan sa Sugbo.
Si Agua nagkanayon nga talandugon ang kahimtang ni Alcansare kinsa dili makasulti ug gipaubos sa operasyon.
Sumala pa ni Agua nga ang closed circuit television (CCTV) camera sa kilid sa balay wala mogana kay walay internet.
Ang balay ni Alcansare daplin sa karsada hinungdan nga ang gunman nakahigayon sa pagpusil bisan naa sa gawas.
Gisubay nila karon ang mga impormasyon nga istrikto si Alcansare ngadto sa iyang mga tawo sa ilang trabaho.