“Ing taung malugud king katenakan magpasaya ya karing penagari na,
Dapot ing kakaluguran da ring masagwa isalwaksabi na ing pibandyan na.”
~ Diparan│Dangka 9: Sunis 3
(Proverbs 29:3)
“Ngana mu naman karing keyang talapanalig:
‘Ating mabanding tau a tinanggap metung a parsala
a ing talapamala sasalwaksabi na la ding kayang pibandyan.”
~ Lukas │Dangka 16: Sunis 1
(Luke 16:1)
“E mu buring asalwaksabi mu ing makapagmulala mung bye,
ing sayangnan mu ing mal mung bye karing masyas a pusu.
O bakit paburen mu la ding e mu kakilalang magsamantala keka?
O bakit paburen mung pagsamatalan da ring alang masabal ditak mu man keka?
E mu buring aryan ing bye mung kisnang pamagsisi, ala nung e mu kasalanan at butul.
Ngamung sasabi, “O bakit e ku tiparan ing sasabyan da kanaku?
O bakit sinakwil ku ing matunud a pamibye-bye?
O bakit e ku mekirandam karing kanakung talaturu, o e ku la tinggap tutwanan?
Ing bye ku melasak na! Ala kung metung man a mikalam a bage malyaring ipakit king bye ku.”
~ Diparan│Dangka 5: Sunis 9-14
(Proverbs 5:9-14)
***
King kabilyan mung asna kasakit at kaplas pati lwa mu kakanan mu na, angga na potang dating ing penandit a ala na kang tutulu agyang kapurit mu mang lwa karing mata mung mengaslak na king dusa uling ing pilubluban mu melangi ya. Daig ne pa ing kalapanting mengapisi-pisi at alang kabasa-basa mu naman at malangi ya pa king baya ning mikakalukung api.
Ala na kang akarapat at nung ating lumapit keka agyang balu mu ulimo ya pa−agyang sabyan na pang pisali me ing kaladwa mu kaya−mekad e na ka mag-adwang isip pa ba’mung akabyusan mu ing daralanan mung kasakitan. Isangla mu na kaya ing segana-ganang ati keka uling e mu na apibata ing dusang daranasan mu.
Makanyan man, uling alang kapupusan ing alang-panayang kapalit at e mangabiran a lugud na keka ning Ginu—pagkaluban na ka pa mu ring kalam, lunus at kaligtasan king sablang kasakitan lalu na ing pangakawani at pamangalingwan mu Kaya. Kasi pin kaluguran at pakamalan Na ka−balu mu man o ali−panwalan mu man o ali−paulagan mu man o ali.
At uli na pin ning pakalulu Na keka, akabyusan mu ing kasakitan at dusang daralanan mu agyang e mu na kaylangang ipisali ing sarili mu king ulimo. At mibalik na ka king sadya mung bye. At akalingwan mu na ing denasan mu. At mye na ka na naman anti king sadya. Kelingwan mu pa mekad ing pasalamat ka king Ginu mung mikabus keka.
Kanitang mikabus na ka uli ning kalam a tinggap mu king Ginu─akalingwan mu na ing pamagmakalunus mu king ninu mang makapakabus keka at ita alang aliwa nung e mu ing lulugud kekang dalise─ing e managalingwan at e magpabustan keka. Ninu pa mo nung aliwa ing kabud mu magdili-diling makapagkalub pangakabus, kapayapan, at lugud keka?
Ing Ginu mu Yang makabye kekang pangakabus uling Ya mu ing tune talapangabus kapamilatan ding mayupayang Nwan nang Lagyu.
Kaybat milabas ding dakal a aldo at makabang panaun, mesaya na ka na naman at ing sakit akalingwan mu ne Ya ing misubli keka king tune mung sukat kabilyan a kapayapan at ligaya. Kayagnan na nita, ditakditak dapot bitasa magmula na ing pamangalingwan mu king kekang Talapangabus at akalingwan mu na mu naman a e mu agyu at alang makiagyung makapangabus keka nung aliwa mu Ya.
Metung a biglang penandit at maginalu na ka pala. Panagalan mu ing inawa mu at ing pusu mu’t isip kasna ya king kapigaganakan a dakal ka lakwang pakamalan, pibandyan, dangalan at matas a kabilyan agpang king isip mung mapangalingwan. At mitda na ing panimanman mu kabang deta ring gaganakan mu at akalingwan mu nang maus king Lagyung Banal ning Ginu, inya sa’t pangapatad ning inawa mu─mesalwaksabing misan mu ing sablang pakamalan mu, paulagan mu at pibandyan mung pangsaguli.
Magumpisa na ka na namang pasibayu. Mu pin e mu balu nung nu ka, makananu ka at nanung katawan ing mika-atin ka king kangatbang bye. Migasalwaksabi ka kasi, abe.
***
Dake Talabaldugan:
mikupakan (pangdiwa) mipangupak adwa o migit pang tau. English – hit each other’s nape or back of one’s head. Alimbawa king pamangamit: “Mipamiru la pa nandin kabang miminum lang alak deng adwang mikakaluguran, kaybat kabud na la mu mikupakan.”
mikupasan (pangdiwa) mirinang aliwang kule o rusing. English – some clothes that got discoloured due to being mixed with other colored clothes or fabric. Alimbawa king pamangamit: “Pisamut-samut na lang Uling deng imalan inya pala mikupasan la reng maputing saya nang Elsa, asna ne pamo kaburing susulud ita neng gagayak de neng Mayu.”
mikupitan (pangdiwa) adwa o migit pang taung mipangupit. English – filched or pilfered petty cash from each other. Alimbawa king pamangamit: “E da agawang mikupitan deng miyasawang tapat king baling metung agyang gipit o lipit na ing panaun.”
***
MIKASING-KABALDUGANG AMANU TAMU
Deni ring mepiling amanung miyawig-awig o mikasing-kabaldugan king aldo iti:
Tipa – malis manibat babo papunta king lalam o keng mababa.
Kuldas – lumipat manibat keng matas a penibatan o saken a susulung a pepatuknangan.
Dulung – munta king mababang dane.
Lusung – malug king malalam a danum.
Baba – manibatan king matas papunta king mababa.
PANAGKAT: Nung atin pung mekalingwan, melakto, kulang o mali karing amanung megamit, pakisulatanan o pakitext o call ing Kapisik. Pisopan-sopan tamu ing belwan.
Dakal pung salamat.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.