Di man maluya kining mga tigsuporta online ni kanhi senador Ferdinand ‘Bongbong’ Marcos Jr. bisan og sagunson nga absent ang ilang idolo sa mga media forum alang sa mga kandidato sa pagka presidente.
Gani, motabang pa sa pagtabon kining mga tigsuporta sa mga kahuyangan sa ilang idolo. Ang labing ulahing higayon mao kining pag-absent na sab ni Marcos Jr. sa interview sa mga kandidato alang sa pagka presidente sa Kapisanan ng mga Brodkaster ng Pilipinas (KBP).
Nitahod ang KBP sa pagbalibad ni Marcos Jr. sa maong interview. Apan human sa iyang pagbalibad sa laing interbyu ni Jessica Soho alang sa GMA 7 ug kadtong wa niya pagtunga sa usa ka hearing sa Commission on Elections (Comelec), makaingon na kita nga daw kinaiya na kini.
Hinuon, mahimo sab nga stratehiya kining paglikay og mga higayon nga makapadayag si Marcos Jr. og mga sayop pamahayag.
Mao kini pasiaw sa una sa akong amahan dihang buhi pa. Daghan sulti, daghan sayop. Gamay sulti, gamay sayop. Walay sulti, walay sayop.
Kining tigsuporta ni Marcos Jr. nagtuo nga kinahanglan duphan kining maong kinaiya sa ilang idolo. Di sila gusto nga pangutan-on si Marcos Jr. kabahin sa pangawat sa iyang ginikanan, ang iyang pagpamakak kabahin sa iyang natiwas sa pagtungha, ug ang iyang pagkakumbikto isip tax evader.
Masipyat pa lang og angkon sa tinuod. Hahaha!
Ang ako lang, mao ra kiniy bakakon nga mahadlok masipyat sa iyang mga bakak. Ang ubang bakakon kay anad na man. Di man mahadlok og interbyu. Makahinumdom man sila kabahin sa ilang gipamakak.
Lahi ra gyud kon di mamakak kay di angay mahadlok moatubang og interbyu. Apan si Marcos Jr. di na lang painterbyu.
Magsalig hinuon si Marcos Jr. sa iyang mga tigsuporta online nga maoy mopalikoy sa istorya.
Bakuna
Gibalita nga naabot na sa Manila ang unang batch sa mga Pfizer vaccines alang sa bata nga 5-11 anyos. Magsugod na karong Lunes ang pagbakuna sa mga bata diha sa kaulohan ug mga silingang mga lalawigan.
Manghinaot ko nga di na madugay nga masugdan na sab ang pagbakuna sa mga 5-11 anyos dinhi sa Sugbo.
Mabalaka man gud ko sa mga bata nga moguwa nga walay proteksyon batok sa Covid-19 gawas lang gyud tawon sa maskara, alcohol, ug social distancing. Lisud ra ba gyud pasundon ang mga bata niining mga protocols.
Pananglit simbako nga masakit ang mga hamtong nga sakop sa panimalay. Mas dali nga mataptan intawon ang mga bata. Dayon ra ba, ang mga walay bakuna mas grabi ang epekto sa Covid-19.
Ang nakapait ra ba kay nag-una na karon ang Cebu sa kadaghanon sa mga kasong Covid-19. Dayon naa kitay opisyal sa kagamhanan nga dili kumbinsido kabahin sa pagpamakuna.
Carbon
Naglibog gyud ko nganong gipadayon sa Megawide Construction Corporation ug sa Cebu City Hall kining giingong magtukod og Puso food court diha sa lugar nga giangkon usab sa Cebu Port Authority (CPA).
Naa pa man gud kanang pangutana kon kinsa ang tag-iya sa maong luna diha sa korte.
Mao nga kuyaw kaayo alang sa Megawide kining ilang kalaki. Apan nganong ila man gihapong gidalidali? Nasiguro ba sila nga silay modaog sa maong kaso unya? (DM nako sa @anol_cebu)