Tulo sa mga dagkong pulitikanhong partido sa dakbayan sa Sugbo ang ningpakita na sab sa ilang panaghiusa bisan pa nga managlahi ang ilang mga kandidato sa pagka presidente nga ilang gisuportahan sa 2022 elections.

Kini human usa ka hulagway ang gi-post sa Facebook niadtong Biyernes, Pebrero 4, 2022, nga nagpakita kang Cebu City Acting Mayor Michael Rama, nagtukod sa Partido Barug; City Councilor Raymond Garcia, kansang amahan, si kanhi mayor Alvin Garcia, maoy nagtukod sa Kugi Uswag Sugbo (Kusug); ug kanhi city councilor Jose “Joey” Daluz III, kinsa mibanhaw sa Partido Panaghiusa; kanhi City Administrator Floro Casas Jr., ug Office of the Presidential Assistant for the Visayas Michael Dino, nagkahiusa sa usa ka hulagway.

Ang panagtagbo nahitabo niadtong Martes, Pebrero 1, sa usa ka hotel.

Si Rama nitug-an sa SunStar Cebu nga wala nay angay klarohon sa hulagway nga iyang gi-post, sanglit nag-uban na sila ug nagkahiusa sukad pa kaniadto.

“Yes, we’ve been united [since then]. Ato rang gi highlight namo karon is inig sugod sa February 8, ang akoang mga tarpulin, Partido Barug. But within that group, it has already been there and that cannot be removed. That is the history of team Rama,” matod sa mayor.

Sa laing bahin, giklaro ni Daluz nga bisan pa sa nahitabong panagbingkil karong bag-o, wala kini magpasabot nga nagkabuwag na sila.

Iyang gitataw nga ila lang gipakita nga mas lig-on ang ilang grupo sa tulo ka partido politikal sa dakbayan sa Sugbo kaysa kaniadto.

“Yes there were intramurals inside the group but we never at any time parted ways.... this time we are showing that our group is stronger as ever... we’re ready to win the political war on all corners,” matod niya.

Dugang pa ni Daluz nga ang Panaghiusa aduna nay kaugalingong mga tarpaulin nga nagsuporta sa ilang lokal nga mga kandidato alang sa umaabot nga piniliay.

“Pang1 is a registered party as well so we will have our own propaganda and machinery supporting local candidates of Barug,” siya nipasabot.

Apan si Daluz niingon nga di mosuporta ang iyang partido sa presidential bet sa Partido Barug, si kanhi senador Ferdinand “Bongbong” Marcos Jr.

Si Daluz nagkanayon nga ang Panaghiusa mosuporta sa presidential bid ni Francisco “Isko Moreno” Domagoso ug vice presidential bid ni Davao City Mayor Sara Duterte-Carpio.

Si Casas, sa laing bahin, wala pa moluwat og pamahayag sa iyang hulagway uban sa mga tawo sa mga partido sa koalisyon, apil si Rama.

Niadtong Hunyo sa miaging tuig, si Rama niingon nga “usa ra ang ilang kaaway” nga nagtumong sa partido ni kanhi Cebu City Mayor Tomas Osmeña sa Bando Osmeńa Pundok Kauswagan (BOPK).

Sa sayo pa, gikatahong nireklamo si Casas sa pagtaktak sa daghang mga dumadapig ni kanhi Cebu City mayor Edgardo Labella karong bag-o.

Wa hinuon hinganli sa kanhi city administrator si Rama o Partido Barug dihang iyang gigamit ang pulong nga “traidor” sa eulogy nga nag-una sa paglubong ni mayor Labella niadtong Nobiyembre 26.