Barangay secretary ug kanhi konsehal nangadakpan nga nagduwag mahjong sa Barangay Tutay, lungsod sa Pinamungajan niadtong Sabado, Pebrero 5, alas 3:30 sa hapon.
Gipusasan sila si Rommel Medel Baron, 50, ulitawo ug barangay secretary sa Barangay Tutay; Joselito Jao Delos Reyes, 50, minyo ug kanhi konsehal sa Tutay; Jennifer Atil Yongco, 50; Dante De la Cerna Yongco, 42; ug Junito Lausa Telmoso, 52.
Si Major Vincent Zozobrado, hepe sa Pinamungajan Police Station nga nahinabi sa Superbalita Cebu, nagkanayon nga nakadawat sila og report kabahin sa sugalan nga dunay daghang nagduwa og mahjong.
Wala maglangay ang kapulisan nihimo og operasyon ug naabtan ang mga sugarol nagdinaganay apan napusasan ang lima.
Nasurprisa ang kapulisan nga mismo ang barangay secretary ug kanhi konsehal nalakip sa nadakpan.
Narekuber sa kapulisan ang mahjong tiles, usa ka lamesa ug pusta nga P1,600 cash.
Si Zozobrado nipadayag nga nasubo siya nga mismo dunay opisyal sa barangay nga nalambigit sa illegal nga sugal.