USA ka 80 anyos nga biyuda gituohan nga naligid sa pangpang patay na nga napalgan alas 7 sa Lunes sa buntag sa Brgy. Coro, lungsod sa Dalaguete, habagatang Sugbo.
Ang lawas ni Lutgarta Amamangpang Monceda nagsugod na sa pagkadugta dihang napalgan sa iyang silingan human siya ma missing niadtong Enero 29, 2022.
Si Police Senior Master Sgt. Arnold Prenal, sa Dalaguete Police Station nga nahinabi sa Superbalita Cebu, nagkanayon nga ang mga kabanay nibutyag nga ang biktima na-missing human nilakaw.
Usa ka Tirso Payusan Fajardo,61, ulitawo, maoy nakakita kang Monceda diha sa bakilid nga batuon nga dapit.
Kini na-report sa kapulisan alas 10:30 sa buntag Lunes.
Si Prenal nagkanayon nga ilang gisugyot ngadto sa kabanay nga ipa-ubos sa autopsy ang lawas aron mahibaw-an unsay namatyan.
“Batoon nang dapita unya bakilid. Basin naligid ni siya, o unsa pagka-unsaa. Sugod naman pagkadugta. Dili nato madeterminar naa bay samad. Paabuton lang nato nga ma-autopsy,” sumala ni Prenal.
Hinuon, initial walay foul play nga nakita ang kapulisan.