MOSUGOD na karong adlawa ang kampanya sa magpapili sa pagka-presidente, bise-presidente, senador ug party-list alang sa May, 2022 nga National and Local Elections. Sugod karong adlawa daghang mga pakulo ang buhaton sa mga kandidato aron lang ilang makuha ang suporta sa mga Filipino.
Wa pa gani nagsugod ang pormal nga kampanya, apan ang mga kandidato daw sama sa nagkampanya na. Daghan na kaayong mga propaganda ang mabasahan sa mantalaan, makatan-aw sa telebisyon ug madungog sa radyo diin kining tanan anaa usab sa social media ilabi na sa Facebook ug YouTube.
Kaniadto ang rekisitos o ba kaha limitasyon sa paggamit sa election propaganda nagtutok lang sa broadcast election propaganda ug printed or published election propaganda apan ning higayona pinaagi sa Comelec Resolution 10730 giklaro na ang kabahin sa internet, mobile and social media propaganda lakip usab niini ang electronic rallies (e-rallies) ug livestreams.
Ang matag partido ug kandidato gikinahanglan nga morehistro sa Education and Information Department sa Comelec sa ilang official accounts, websites, blogs ug ubang social media pages kansang sa higayon nga ilang masusi kini mao ra usab ang mabutangan sa electoral ads ug maka-boost o maka-promote sa ilang electoral posts.
Gitugtan ang e-rallies ug livestreams atol sa kampanya ug wa silay limitasyon kabahin sa broadcast advertising apan tumanon nila ang minimum health protocols ug mopadala silag recording sa Comelec sud sa 72 oras human sa ilang gihimo kini nga kalihokan.
Mag-atubang og silot nga nalatid sa RA 11332 kun Mandatory Reporting of Notifiable Diseases and Health Events of Public Health Concern Act ang mga kandidato nga molapas niini diin gimandoan ang mga campaign organizing staff nila nga mosumiter sa Comelec og affidavit of compliance sa health protocols sud sa 24 oras human sa ilang kampanya.
Dugang niini, ang Comelec mopahuwam sa ilang social media channels alang sa mga magpapili sa national positions diin ang presidente ug bise presidente lakip ang mga partido adunay 10 minutos ang airtime matag usa samtang ang mga midagan og senador ug sa party-list hatagag tres minutos matag usa.
Nindot sa atong pamati kaniadto kon anaa ta nagtambong sa rally nga anaay mga artista ug ang pakigpulong sa mga kandidato. Karon nga anaa na kining e-rally samang kainit ba gihapon kaha ang atong matagamtaman sa atong paglaban sa atong kandidato o partido? (josephelvirtubilan@gmail.com)