ANG Cebu Provincial Operators Transport Cooperative (CPOTC) ug Land Bank of the Philippines nagpinirmahay og kontrata sa Martes, Pebrero 8, 2022 alang sa pag-modernize sa karaang mga minibus nga nagbiyahian sa habagatan sa lalawigan sa Sugbo.
Ang pinirmahay gipahigayon sa Waterfront Cebu City Hotel and Casino.
Si Barili Mayor Julieto Flores, kinsa presidente sa CPOTC ug Allan Bisnar, vice president sa LBP sa Visayas, maoy nagpinirmahay sa P30 milyones nga loan alang sa 12 ka bag-ong unit sa minibus ubos sa PUV Modernization Program ni Presidente Rodrigo Duterte.
Si Flores nagkanayon nga karong Marso, ang 12 ka bag-ong unit sa minibus nga maoy mobiyahe gikan sa dakbayan sa Carcar paingon sa Tabunok ug vice-versa mapahimuslan na sa katawhan.
Ang presidente sa CPOTC nagkanayon nga kon magmalampuson ang ilang P30 milyones nga unang loan sa LBP, modugang sila og laing 12 ka units aron mas matagamtaman ang kahamugaway sa mga pasahero nga mobiyahesa Southern Cebu.
Ang kantidad sa minibus nga Euro 5 engine tag P2.5 milyunes. Kini gama sa Fast Autoworld Philippines Corporation nga kanhi Mitsubishi Motors Cebu Corporation nga maoy nagama sa Fuso, supplier sa CPOTC.
Matod pa ni Flores nga ang ilang kooperatiba nipili sa Japanese brand sanglit masiguro nila ang kalig-on sa sakyanan itandi sa ubang brand gikan sa China.
Nitambong sa signing mao si Regional Director Eduardo Montealto Jr. sa Land Transportation Franchising and Regulatory Board (LTFRB) ug ubang mga dinapit nga bisita.
Si Montealto nagkanayon nga ang 12 ka unit sa CPOTC maoy mapuno sa kasamtangang 912 ka modernized PUV dinhi sa Central Visayas, 95 porsyento niini naa sa Sugbo.