MI-PLEAD guilty ang kanhi Bohol Provincial Board Member Niño Rey Boniel nga iyang napatay ang iyang asawa nga si kanhi Bien Unido Bohol, Mayor Gisela Boniel niadtong Hunyo 7, 2017.
Kabanay sa biktima nahupay sa maong kalambuan ug mihulagway nga ‘justice is served.’
Kini maoy gibutyag ni Atty. Amando Virgil Ligutan, nagsilbi nga private prosecutor sa maong kaso, nga mipahibawo nga si kanhi PB member Boniel mi-plead guilty sa kasong homicide pinaagi sa plea bargaining agreement tali sa state prosecutors.
“The accused pleaded guilty earlier in open courts for the killing of former Mayor Giselle Boniel, pinaagi to siya... through plea bargaining,” saysay ni Ligutan sa dihang nahinabi sa Sun.Star Cebu/Superbalita Cebu.
Ang plea bargaining agreement nagpasabot nga gihatagan og kahigayonan ang akusado nga moangkon sa kaso batok niya, bugti sa mas gaan nga silot nga ipahamtang sa korte.
SULBAD ANG KASO
Matod pa ni Atty. Ligutan nga katunga pa lang ang prosecution sa pag-presentar og dugang ebidensiya batok sa akusado, dihang bolontaryo nga niangkon nga iyang napatay iyang asawa.
“The state prosecutor agreed to it and the judge also agreed to it,” tipik sa pamahayag ni Ligutan.
Nagpasabot nga tapos na ang litigation process sa kasong parricide batok ni Niño Rey Boniel.
Mabilanggo si Boniel sa labing taas nga 14 ka tuig.
Apan taliwala sa pag-angkon sa akusado aduna pa kiniy laing kaso nga gi-atubang.
Kini mao ang serious illegal detention ug kidnapping sa bestfriend sa biktima nga si Angela Leyson.
Anaa sa laing korte ang maong kaso nga hangtod karon padayon pang gidungog.
Ang kasong kidnapping adunay susamang silot sa kasong pagpatay nga mao ang pagkabilanggo sa tibuok kinabuhi.
“They are not getting out of jail anytime soon,” dugang ni Atty. Ligutan.
Ang kasong parricide gipahigayon sa Regional Trial Court (RTC) Branch 70, Lapu-Lapu City.
BACKGROUND
Si Gisela Bendong-Boniel, 38, gidagit ug gipatay niadtong Hunyo 7, 2017.
Ang iyang bana nga si Niño Rey gidakop pagkasunod adlaw sa dihang ang bestfriend ni Gisela nga si Angela Leyson ug anak niining lalake, 17 anyos ang midangop sa Lapu-Lapu City Police Office.
Gisaysay ni Leyson nga siya ug si Gisela ang gisulod sa mga armadong kalakin-an alas sa 2:00 sa kadlawon niadtong Hunyo 7, 2017 samtang sila namahuway sa Double Barrier Reef Dive Camp & Dive Site didto sa Bien Unido, Bohol.
Gibuhian si Leyson sa unom ngadto sa walo ka lalake nga misulong sa ilang lawak ug gidala sa pantalan sa Tubigon apan wa na makuyog nila si Gisela.
Lakip sa lima ka suspek nga gisikop niatong Hunyo 8 mao si Riolito Boniel, ig-agaw ni Niño Rey kinsa maoy mitumbok nga si Niño Rey maoy mipusil sa iyang asawa samtang sila nagsakay sa pumpboat.
Saysay ni Riolito nga giputos ang lawas ni Gisela og pukot ug gipabug-atan og duha ka dagkong bato.
Apan hangtod karon wa na igkita ang lawas sa mayor nga gilabay sa kadagatan sa Caubian Island, sakop sa Dakbayan sa Lapu-Lapu.
Nagsugod ang maong panagbikil sa magtiayon sa dihang si Gisela miadto sa Commission on Audit sa Tagbilaran City aron pagsang-at og kasong graft and corruption case batok kang Niño Rey, lakip na ang pagpa-annul sa ilang kasal.