Proclamation rally gibaha og saway?

BISAN tuod kon dunay nanaway, apan daghan sab ang nalingaw ug naghudyaka nga nakita nila ang ilang gisuportahan nga mga kandidato sa gilusad nga proclamation rally sa nagkadaiyang dapit sa nasud sa pagsugod sa nasudnong kampanya alang sa Mayo 9, 2022 nga eleksyon.

Atol sa Armed Forces of the Philippines-Philippine National Police (AFP-PNP) Press Conference sa Davao City Miyerkules, Pebrero 9, 2022, gitino ni Commission on Elections (Comelec)-Davao Region Assistant Regional Director Atty. Gay Enumerables, kinsa mao sab ang spokesperson sa maong buhatan, nga dunay rules ang Comelec labot niini.

"Puwede maka-selfie pero lagyo para naa gyod ang physical distancing. Naa sa rules sa Comelec, not the selfie and groupie, pero diha na ang bawal kung magdikit na sila," ingon ni Enumerables.

Una nang gipahibalo sa Comelec National ang ilang bag-ong polisiya sa pagpangampanya nga gibawal na sa mga kandidato ang molamano, halog, beso-beso, selfie-selfie, ug groupie nga magdikit, diin sama sa rally kinahanglan nga mapatuman gayod ang physical distancing.

Nasayran nga pagkahuman sa nagkadaiyang proclamation rally niadtong Martes sa gabii sa mga magpapili sa labing taas nga mga posisyon sa politika sa nasud sa Mayo 9, 2022 nga eleksyon, mibaha sab ang mga negatibong komento sa netizens diha sa social media.

Ang una ug daghang komento sa netizen mao ang kabalaka sa bahad sa coronavirus disease (Covid-19), sanglit padayon pa gihapon ang pagsaka sa ihap sa mga kaso sa variant niini nga Omicron.

Migula ang mga komento diha sa mga Facebook Live diin ang unang miani sa atensiyon sa mga Filipino mao ang dako nga programa nga gidagsa sa daghang supporters ang Philippine Arena sa Bulacan sa proclamation rally sa UniTeam nila presidential aspirant Ferdinand "Bongbong" Marcos Jr., ug vice presidential candidate Davao City Mayor Sara Duterte.

Nagbaha sab ang negatibong mga komento sa mga proclamation rally sa mga kaatbang sa BBM-Sara UniTeam nga natigayon sa nagkadaiyang dapit sa Pilipinas, butang nga nagpahimangno ang Comelec nga motuman sa Comelec rules diha sa pangampanya luyo niining pandemya.

Samtang, luyo sa proclamation rally ni presidential candidate Leni Robredo ug vice presidential candidate Francis "Kiko" Pangilinan didto sa Naga, Camarines Sur nga gidugok sab og mga tawo, nakaani sab kini og mga komento sa netizens. Nahimo pa sab nila nga mopahigayon og "Ronda ng Pagasa," usa ka motorcade nga gihimo sa mga Davao-based supporters sa Roxas Avenue, Davao City Miyerkules sa buntag, Pebrero 9.

Gibida sa mga supporters ni Robrero ang miubos kuno nga survey ratings ni Marcos human nga mibalibad kini sa mga presidential interviews diha sa telebisyon, diin ang kang Robrero padayon nga misaka sa taas gikan Enero 23 hangtud Enero 27, 2022 luyo sa ilang tagline nga "Gobyernong Tapat, Angat Buhay Lahat."

"The new slogan also highlighted how a Robredo presidency, banking on transparency and competence, would be different from the rest of the candidates," sumala sa International Development and Security Cooperation (IDSC).

Dugang pagbida sa Robredo supporters ang giingong peke nga resibong gisumite ni Marcos ngadto sa Comelec isip ebidensiya nga nagbayad siya og buhis subay sa pagbulgar ni kanhi Comelec Commissioner Rowena Guanzon, ug ang giingon isyu sud sa diary ni Ferdinand Marcos Sr. labot sa iyang anak nga si BBM diin nag-trending ang hashtag nga #MarcosDuwag sa social media sa nakalabay nga bulan.

Luyo niini, wala suma pay kamatuoran ang mga nanggawas nga mga isyu batok kang BBM, kini ang pagtin-aw sa kampo ni Marcos Jr. pinaagi sa spokesperson nga si Atty. Victor Rodriguez.