USA ka pulis angol samtang kritikal ang usa ka menor de edad sa panangbangga sa motorsiklo sa dalan sa Barangay Bunga, dakbayan sa Toledo, alas 12:30 sa udto sa Martes, Pebrero 7, 2022.
Si Police Staff Sgt. Mario Gutang Ewayan, Jr., 40, minyo, taga Barangay Capitol Site, dakbayan sa Sugbo ug sakop sa Alert team sa Aloguinsan Police Station, nabalian sa iyang wala nga tiil.
Samtang talandugon ang kahimtang ni Junreil Abellanosa Siatanan,16, taga Purok, Sambag, Barangay Bunga, Toledo City.
Si Police Staff Sgt. Jonathan Cuizon sa Toledo Police Station nga nahinabi sa Superbalita Cebu nagkanayon nga si Ewayan gikan sa Aloguinsan Police Station nagsakay sa iyang Honda Beat nga motorsiklo padulong sa dakbayan sa Sugbo.
Iyang gikasugat si Siatanan, kinsa sakay sa Suzuki Smash, nga padulong mopauli sa balay.
Sa pag-abot sa nahisgutang lugar, si Siatanan nilikay sa libaungon nga bahin dalan hinungdan nga nasulod siya sa pikas lane.
Akto sab nga iyang gikasugat si Ewayan hinungdan nga nagkabangga silang duha.
Gumikan sa ka kusog sa impact sa bangga, nangalagpot ang duha.
Si Ewayan naa sa tambalanan sa lungsod sa Balamban, samtang ang menor daling gidala sa tambalanan sa dakbayan Sugbo.