Mga duwa karon:
4:00 pm- Blackwater
batok Terrafirma
6:00 pm- Rain or Shine
batok NorthPort
Mabunyagan na Philippine Basketball Association (PBA) ang produkto sa University of the Visayas (UV) Green Lancers nga si Rey Suerte.
Ang kanhi 2-time MVP sa Cebu Schools Athletic Foundation Inc. (Cesafi) moduwa na sa iyang mother team Blackwater Bossing karong alas 4:00 sa hapon batok sa Terrafirma Dyip sa Governor’s Cup sa Araneta Coliseum.
Si Suerte usa sa lima ka mga napili sa Gilas PBA special draft niadtong 2019 diin gikuha siya sa Bossing isip No. 2 pick.
Sa kasabutan sa Gilas PBA special draft, ipahuwam una ang lima ka mga napili ngadto sa Samahang Basketbol ng Pilipinas (SBP) alang sa kampanya sa Gilas Pilipinas sa nagkadaiyang international competitions.
Dili pa lang dugay, nahuman na ang kontrata ni Suerte sa Gilas ug nakadesisyon na kining moduwa sa PBA.
Ang Bossing kasamtangang nagbitay sa labing ubos nga luna sa standings diin wala pa sila nakadaog bisan usa sulod sa lima ka mga duwa.
Hinuon malaumon ang Bossing nga sa pag-abot ni Suerte ug sa kausaban nga ilang gihimo sa ilang puwersa, hayan makahagpat na sila og suwerte sa pagpadayon sa ilang kampanya.
“Ang sabi ko sa kanila, think of it as 0-0,” matod ni Blackwater coach Ariel Vanguardia nga napatik sa www.pba.ph.
“Sinabi ko rin na we’re gonna look at it na parang start ulit kami from scratch.”
Sa main game, magsangka ang Rain or Shine Elasto Painters ug NorthPort Batang Pier karong alas 6:00 sa gabii.