HUMAN sa akong TV interview sa mi-aging Sabado mahitungod sa breast cancer, dunay na intriga unya nangutana nako kung magkasakit ba sab ang mga lalake og breast cancer.
Akong ipaambit sab diri ang akong tubag aron mabasahan sab sa uban.
Matod sa Mayo Clinic talagsaon ra kaayo nga dunay magka breast cancer sa mga lalake apan duna gayoy nagkasakit ini apan gamay ra nga porsento unya kumon sa mga lalaking edaran.
Sama sa ubang cancer kon kini madiparahan og sayo, mas taas og puruhan nga maayo pa.
Kasagaran operahan aron tangtangon ang breast tissue nga dunay cancer unya sundan dayon kini og chemotherapy o radiation therapy.
Unsa may kasagarang simtomas ini?
Dunay makapkapan nga bogul-ogol sa may suso nga way sakit, kausaban sa hitsura sa totoy sama sa pagpamuwa, magkandiis, kausaban sa may atngal sama sa pagpamuwa, pagpanglupyak o bali sa atngal nga mopadong na sa sulod, o dunay likido nga manggawas sa mismong atngal.
Unsa may kasagarang maka-ingon ini?
Way klarong ebidensiya sa tinubdan ini apan kita tanan gipakatawo man nga naay suso, gamay lang hinuon nga breast tissue ang sa mga lalake. Kining breast tissue gikan kini sa mga glands nga maghimo og gatas kon lobules nga maoy modala paingon sa angal.
Kon ma teenager na gani, ang mga babaye mo-develop og daghang breast tissue maong modako na sab og sugod ang totoy. Bisag ang mga batang lalaki gamay ra og breast tissue, naa gihapoy posibilidad nga magka breast cancer.
Dunay ubang lalake nga makasunod og abnormal nga gene (mutated) gikan sa ilang mga ginikanan maong mas taas og puruhan magka breast o prostate cancer labi na kon naa ang gene nga gitawag og BRCA2 .
Kining mosunod maoy kasagarang risk factors sa breast cancer: edaran o 60 anyos na pataas, exposure sa estrogen related drugs labi na katong gigamitan og hormone therapy, dunay family history o kaliwat nga dunay cancer, tambok o obese nga taas og estrogen level , naka-agi og operasyon o naghubag nga bayag.