USA ka mgagtutudlo napalgang sa iyang kabanay nga nagbitay sulod sa panimalay sa Barangay Kang-aktol, lungsod sa Dumanjug niadtong Huwebes, Pebrero 10, alas 12:30 sa udto.
Si Del (di tinuod nga ngan), 56, biyuda, public School teacher, wala nay kinabuhi dihang naabtan sa iyang mga kabanay.
Si Police Master Sgt. Oscar Badilla, imbestigador sa Dumanjug Police Station nga nahinabi sa Superbalita Cebu, nagkanayon nga si Del katapusang nakit-an niadtong Miyerkulis sa gabii, Pebrero 9.
Ang kabanay nangutana sa biktima nganong nagsige og dangoyngoy pero wala gayud kini motubag ug nagpadayon sa paghilak.
Wala na lang samoksamoka sa pagpangutana, gipasagdan na lang sa kabanay.
Apan Huwebes sa udto, nakugang sila kay nagbitay na sulod sa panimalay niini nga walay kinabuhi.
Sumala ni Police Master Sgt. Badilla, sa ilang pasiunang imbestigasyon, nga hikog ang namatyan sa magtutudlo ug walay nakita nga foul play.
Ang kabanay nipaubos sa autopsy sa lawas sa magtutudlo.
Atol sa pagkutlo ning taho, wala pa mogawas ang autopsy report sa Scene of the Crime Operations (Soco) 7.
Ang biktima gikatahong taodtaud nang biyuda hinungdan nga nahibulong ang kabanay kon unsay rason nganong nagpakamatay kini.