UPAT ka Oponganon nga nasulod sa Top 10 sa 2021 Licensure Examination for Teachers (LET) ang gipasidunggan ni Kongresista Paz Radaza, lone congressional district sa Lapu-Lapu City.
Lakip nga gipasidunggan ang Olangohanon nga midaog sa ‘Elite Mrs. Philippines International’ 2021 si Ginevive Atigua Louw.
Ang maong kalihokan gipahigayon sa usa ka restaurant sa Barangay Ibo, Lapu-Lapu niadtong Pebrero 9, 2022.
Si Cong. Radaza sa iyang bahin nagkanayon nga angayan lang nga pasidunggan gumikan sa kadungganan nga gihatag sa dakbayan sa Lapu-Lapu.
Ang maong LET topnotchers naglangkob nila ni; Victor Amigable Jr. – 4th placer, Australia Malingin - 7th placer, Ma. Louviña Yote - 8th placer, ug Judy Ann Eborde - 7th placer sa maong pasulit.
Gawas sa certificate ug token, nakadawat sab sila og cash reward sa nagkadaiyang kantidad base sa ilang ranking, gikan sa P5,000 ngadto na sa P10,000.
Si Louw nakadawat sab sa susamang recognition ug pahalipay gikan sa kongresista.
“You have impressively excelled in your endeavors. You gave us pride and inspiration to always do our best. Proud kaayo mi ninyo. Congratulations!,” matod ni Radaza atol sa iyang pakigpulong.
Pasabot sa opisyal nga nalangay ang paghatag sa maong pasidungog tungod sa pandemiya ug ang pag-igo sa Bagyong Odette, resulta nga nauswag ang orihinal nga plano sa recognition rites.
“Bisan sige og ka-postponed, what is important is that we are now already here. Init ug lab-as pa gihapon ang atong rason para iselebrar ang ilang kadaugan para sa ato,” dason ni Radaza.