DUHA ka ex-convict nasikop sa managlahing buy-bust sa kapulisan sa Probinsya sa Sugbo niadtong Sabado sa kaadlawon ug pagka gabii, Pebrero 12.
Binultong drugas ang nasakmit sa kapulisan atol sa ilang buy-bust alas 12:00 sa tungang gabii sa Sabado sa Barangay Poblacion 1, dakbayan sa Carcar.
Si Rextor Villasquina, 34, minyo, ex-convict, ug taga Sitio Awayan, Poblacion 3 sa Carcar, ang napusasan.
Si Police Lt. Col. Ardioleto Cabagnot, Jr., hepe sa Carcar Police Station nga nahinabi sa Superbalita Cebu, nagkanayon nga si Villasquina, ilang nakuhaag siyam ka gagmay’ng putos sa shabu, duha ka medium nga putos sa shabu, buy-bust money P500, ug usa ka .357 revolver uban sa lima mga bala.
Ang drugas mitimbang sa 2.75 gramos mobalor sa P18,700 sa Dangerous Drugs Board (DDB) value.
Kabahin sa ilang kampanya batok sa drugas, nasikop sab nila ang laing tulo ka drug pusher atol sa buy-bust.
Si Xeryl Ledesma, 38, taga Brgy. Valladolid sa samang dakbayan ug nasikop sa Awayan, Poblacion 3, Carcar, alas 2:20 sa hapon sa Sabado. Nakuhaan og P2,720 balor sa drugas.
Sila si Jezreel Beah Aldave, 24, ulitawo, nasikop sa alas 6:15 sa gabii sa Sabado sa Brgy. Bolinawan, Carcar ug Joshua Rabanes, 20, ulitawo, nasikop alas 12:00 sa kaadlawon.
Samtang napusasan sab ang laing ex-convict nga nakuhaag binultong drugas, armas alas 11:55 sa gabii Sabado, sa Purok 1, Barangay Esperanza, lungsod sa Aloguinsan.
Si Police Lt. Roberto Barnido, Jr., hepe sa Aloguinsan Police Station nga nahinabi sa Superbalita Cebu, niila sa dinakpan nga si Emeterio Dayanan Laña Jr., alyas Alo, 43, ulitawo, ex-convict ug nagpuyo sa nahisgutang lugar.
Si Police Lt. Barnido nibutyag nga si Laña, nagpadayon sa illegal nga kalihukan human nakagawas sa prisuhan.
Nakuha ang lima ka gagmay’ng putos sa shabu, usa ka medium putos, P500 halin, P500 buy-bust money, usa ka unit sa caliber .45 pistol, magazine nga dunay pito ka mga bala.
Ang gidiling drugas motimbang sa 1.15 gramos, mobalor sa P7,820 base sa DDB value.