MGA bata nga nangubkob og anapog nga yuta nga ning-abag sa panginabuhian sa kabus nga pamilya ang nisangko sa trahedya.
Usa ka 10 anyos nga batang lalake ang patay ug angol ang laing 12 anyos ug 4 anyos nga bata human natabunan sa nalusno nga bukid sa anapog nga nalangob og gamay sa ilang pagkubkob sa Purok Atis, Barangay Kanhulangon, lungsod sa Tabuelan niadtong Sabado, Pebrero 12, alas 3:30 sa hapon.
Ang namatay mao si Johnrell Aragon, 10, ug ang naangol mao sila si Rizalie Lumapas, 12, ug Christian Lumapas, 4.
Ang mga bata uban sa ilang kabanay nga menor de edad usab nga nangubkob sa anapog aron ibaligya ug ipalit og pagkaon sa pamilya.
Si Police Staff Sgt. Ver Hortelano, imbestigador sa Tabuelan Police Station, nagkanayon nga dunay kauban sa tulo ka bata nga si Christala Lumapas, 14, nga nangubkob sa dapit.
Sumala sa kapulisan, ang quarry area dunay gilay-on nga 50 metros gikan sa balay sa mga biktima.
Ang amahan sa nakabsan sa kinabuhi nagtrabaho isip panday ug mag-uuma sa samang higayon.
Ang ilang mga ginikanan niadtong higayona naa sa umahan.
Matod ni Hortelano, ang 14 anyos nibutyag nga ala 1:00 sa hapon sa Sabado nagsugod sila sa pagpanguykoy ang mga bata apan sa pagka alas 3:30 sa hapon, kalit nga nahulpa ang usa ka dakong bato o yuta nga anapog hinungdan nga natabunan ang tulo ka mga bata.
Ang 14 anyos nga si Christala nakadagan apan ang iyang manghod ug duha ka ig-agaw, natabonan.
Dunay laing mga pamilya sa pikas bahin sa nanguykoy nga mao ang nagdali sa pagtabang sa mga biktima hangtod niabot ang ubang silingan nga nitabang sa pagluwas.
Apan nakabsan gyud sa kinabuhi ang 10 anyos nga si Jhonrell ug angol ang duha ka bata.
Sila si Rizalie ug Christian gidali sa pagdala sa Juan Dosado Hospital sa lungsod sa Sogod.
“Sige ni silag bakbak mga bata sa anapog, didto ang uban sa likod, unya walay nakabantay nga gamay nalang kaayog nagkupot nahugno,” asoy ni Hortelano.
Ang mga bata naandan na nila nga motabang sa ilang ginikanan sa pagpangita og kwarta aron makapalit og makaon.
“Lisod man ilang pangita sa bukid, mao ning nangyawat sila sa P20 ang sako nga palit sa anapog, mao nga ang mga bata motabang sa ilang ginikanan,” sumala ni Hortelano.
Ang maong quarry area dunay gilapdon nga 200 metros kuwadrado sa maong barangay.
Ang barangay kapitan sa dapit nga nahinabi sa kapulisan nga kadtong nagpatrabaho sa iyang panimalay, diha siya nagkuha og pang-abuno sa pundasyon.
Gumikan sa nahitabo, nangayo kinig abag sa lungsod aron mabungkag sa bulldozer ang maong area.
Samtang gidili na usab karon ang pagpanguykoy sa mga anapog sa dapit.