MIAPIL na ang batan-ong dunker nga si LeBron Lopez sa training sa Gilas Pilipinas, nga hugot na’ng nangandam alang sa umaabot nga February window sa Fiba World Cup qualifiers.
Si Gilas coach Chot Reyes nag-post og video sa social media sa ialng team training sa Moro Lorenzo Sports Center sa Manila kagahapon, Pebrero 14, 2022 diin makita ang 18 anyos nga Fil-Angolan.
Nakapakita na og aksyon si Lopez sa national team sa 2021 Fiba Asia Cup qualifiers sa Clark, Pampanga diin mirehistro siya og walo ka puntos ug lima ka rebounds sulod lang sa 10 minutos nga pagduwa diin gipangmakmak sa Gilas ang Indonesia, 76-51.
Siya maoy katapusang napili aron morepresentar sa Pilipinas sa Belgrade Olympic Qualifying Tournament.
Moduwa sab unta si Lopez sa Overtime Elite League sa Amerika apan wala kini nadayon gumikan kay nagkaproblema kini sa iyang US visa.
Ang Ateneo Blue Eagles forward nanghinaot nga mapilian sab siya aron moduwa sa Gilas alang sa Fiba qualifiers.
Ning maong kompetisyon, ang Gilas Pilipinas makigbatok sa higpit niining karibal nga South Korea karong Pebrero 24, 2022, batok sa India karong Pebrero 25, batok sa New Zealand karong Pebrero 26 unya makigsangka og balik ang mga Pinoy sa mga Koreano karong Pebrero 28.
Ang tanang mga duwa ipahigayon sa Araneta Coliseum.