Manghod gipusil patay sa iyang maguwang atol sa ilang lalis sa gitanom nga mga luy-a sa alas 7 sa buntag sa Dominggo, Pebrero 13, sa Sitio Artewe, Brgy. General Climaco, dakbayan sa Toledo.
Wala pa masikop sa kapulisan si Christopher Parba Benlot, 28, mag-uuma, dunay kapuyo, sa iyang pagpatay sa iyang manghod nga si Renante Parba Benlot, 26, mag-uuma, kinsa naigo sa agtang.
Patay nang niabot sa ospital si Renante.
Ang duha nagkalalis kabahin sa gi-harvest nga tinanom nga mga luy-a sa ilang umahan, apan ang luna di ilaha.
Si Christopher nibunot sa iyang kalibre .45 nga pistola ug gipusil sa agtang iyang manghud.
Ang pagpamusil diha sa nataran sa ilang panimalay, diin nasaksihan mismo sa kapuyo ni Renante ug kabanay.
Si Police Lt. Col. Dennis De Guzman, hepe sa Toledo Police Station nga nahinabi sa Superbalita Cebu, nagkanayon nga kasina o kasuya sa maguwang ngadto sa iyang manghud ang hinungdan.
Kini tungod kay si Christopher wala paapila ni Renante sa pag-ani sa mga luy-a.
“Its a long time dispute sa pamilya itong biktima at saka suspek, matagal nang may alitan,” dugang ni De Guzman.
Gipadayag niya nga hayan nasina si Christopher kay wala siya paapila ni Renante sa pag-ani apan ang ilang mga kabanay gipaapil.
Giandam na nila ang tukmang kaso nga ipasaka samtang dunay mga report nga motahan si Christopher.