Gilibkas man tuod sa Dakbayan sa Mandaue ang curfew, apan alang lang kini sa mga hamtong nga nag-edad og 18 anyos pataas, way labot ang ubos sa 18-anyos kun mga menor.
Sa Executive Order No. 47, Series of 2022, ni Mandaue City Mayor Jonas Cortes gilibkas ang curfew sugod karong adlawa, Pebrero 16, 2022, aron makabangon na ang mga negusyo ubos sa jurisdiction sa Siyudad nga apektado kaayo sa restrictions sukad nagsugod ang Covid-19 pandemic.
Kini human ang dakbayan ug ang kinatibuk-ang isla sa Sugbo ug ubang mga lalawigan sa Central Visayas gibalik ngadto sa Level 2 quarantine classification gikan sa Pebrero 16-28 tungod sa padayong nagkaubos nga mga kaso sa Covid-19.
Ang curfew alang sa mga menor magsugod sa alas 11 sa gabii hangtod sa alas 4 sa kadlawon pagkasunod adlaw.
“In view of economic considerations to allow business establishments to recover from the effects of the pandemic, the curfew period imposed within the territorial jurisdiction of Mandaue City adopted as part of health measures to address the pandemic is hereby lifted,” matod sa tipik sa EO.
Gitugtan usab ang mga establisemento ug mga kalihukan apan hangtod lang sa 50 porsyento sa iyang kapasidad alang sa fully vaccinated ug sa 18 anyos paubos, bisan kon di hingpit nga bakunado, kon ang dapit indoor samtang 70 porsyento kon outdoor.
Apan gikinahanglan nga ang mga kawani ug nagdumala sa mga establisemento ug organizers kinahanglan nga fully-vaccinated batok sa coronavirus disease 2019 (Covid-19).
Gitugot na ang pagbukas sa mga sinehan, mga kan-anan, internet cafes, amusement parks, billiard halls, swimming pools ug uban pang samang venue.
Gitugot na sab ang limitadong face-to-face classes kun inatubangay alang sa higher ug vocational education.
Mabuksan na sab ang barbershop, salon, hair spa ug uban pa apan ubos sa protocol sa Department of Trade and Industry (DTI).
Gitugot usab ang pagpamaligya ug pag-serve og ilimnong makahubog basta ang establisemento dunay lisensya sa pagbaligya ug pag-serve.
Apan gidili gihapon ang pag-inom sa publikong mga lugar sama sa karsada, sidewalk, bukas nga public places ug sa mga establisemento nga way permit.
Gidid-an gihapon ang mga casino, buwangan, lottery ug betting ug uban pang gaming nga mga establisemento sa pagbukas gawas kun gitugtan sa Inter-Agency Task Force (IATF) o sa Office of the President.