USA ka construction worker nasikop human nilabni sa mobile phone sa iyang menor de edad nga silingan sa Barangay Talavera, dakbayan sa Toledo niadtong Martes, Pebrero 15, alas 8:30 sa gabii.
Si Maychaila Grace Basalo, 17, tinun-an sa Grade 12, nagpuyo sa nahisgutang lugar, nangayo og tabang sa ilang kabanay ug nasikop ang suspek nga si Stephen Labrador, 23, construction worker, dunay kapuyo, molupyo sa nahisgotang dapit.
Sumala sa biktima ang selpon mobalor og P7,000 nga gihatag sa iyang mga ginikanan kaniya.
Si Police Staff Sgt. Roy Olasiman sa Toledo Police Station, nagkanayon nga ang biktima naglakaw padulong sa usa ka tindahan aron magpa-load sa selpon apan kalit nga giduol ug gilayog sa suspek dayong kuha sa selpon sa bata.
Naalarma ang mga silingan ug gigukod ang suspek apan kalit nga nahanaw.
Sa follow-up operation sa kapulisan, nasikop si Labrador sa alas 11 sa gabii sa Martes.
Matod ni Olasiman nga si Labrador niangkon sa pasangil batok kaniya.
“Gutom na daw kaayo sila kay wala siyay kwarta, walay nakapalit og bugas ingon man gatas sa bata hinungdan nga gilabni niya ang selpon,” asoy ni Olasiman nga katarungan sa suspek dihang giimbestigar.
Si Labrador nailhan sa biktima hinungdan nga siya nasikop.
Si Labrador gitanggong sa kapulisan sa Toledo ug nagpaabot kon mopasaka ba og kaso sa korte ang pamilya sa menor de edad o mopasaylo kaniya.